Euro 2024 thleng tur Germany

Europe football thuneitu sang UEFA chuan Ningani zan khan Euro 2024 thleng tur an tichiang a, khawmualpui football khawmpui lian pakhat hi a vawi khat nan Germany chuan a thleng dawn.

West Germany tih a nih laiin 1988 khan Euro hi an thleng tawh a, mahse Germany tih a nih hnuah erawh Euro hi an la thleng ngai lo. Nyon, Switzerland-a thutlukna an siamah Turkey nen buk an nih hnuin Germany kutah hlan a ni.

Germany hian 2006 World Cup khan an thleng a, champion zo lo mah se 2014 Brazil-ah an champion. Euro hi vawi thum - 2008, 2012 leh 2016 te khan thlen an dil a, an hlawhtling lo. Heng bakah hian 2020 Summer Olympics thlen an dilna pawh hnawl a ni; tunah chuan an hun a inher chhuak ve dawn ta.

Thutlukna an puan hmain UEFA president Aleksander Ceferin chuan Germany leh Turkey ten thlen ngei tumin thapui an thawh tih a sawi a, a thleng tur a chian hnuah langtlang taka thil an tih thu a sawi bawk. Ceferin chuan, "Euro 2024 ropui leh danglam tak hmuh ka inbeisei," a ti.

Euro 2024-ah hian team 24 an tel dawn a, June leh July thla chhunga khelh tur niin, ni 32 chhungin match 51 khelh zawh tur a ni ang. Euro C'ship champion lai chu Portugal niin, 2016 khan a thlengtu France hnehin nomawi an chawi a ni.