Electric Vengin semifinal an lut dawn?

Mc Dowell's No. 1 Soda Mizoram Premier League Season 7-ah club thar Electric Veng FC chuan David Lalchhuanawma goal hnih hmangin Ningani zan khan Bethlehem Vengthlang FC chu 2-1 in an hneh a, MPL club thar hian match nga lek aṭangin point 13 an hmu a, semifinal lut turin an dinhmun a ṭha hle.

Electric Vengin season bul ṭantirha an tum hmasak ber chu relegate loh a ni a, tunah chuan semifinal an thleng lo a nih chuan an lungawi tawh lo ang. Bethlehem Vengthlang erawh match nga an khelh aṭangin point khat chiah an la hmu a, an khelh dan leh a huaisenna milin point an hmuh loh avangin relegate lo turin insiamṭhat ran an mamawh hle.

Hmuhnawm dangdai

Electric Vengin I League club Aizawl FC bakah team ṭha dang Chanmari FC leh Mizoram Police te an hneh tawh a, amaherawhchu an budget mil pui Chawnpui nen an inhnehtawk avangin Bethlehem Vengthlang nena an inkhel hi fiahna anga ngaih theih a ni.

Lammualah inkhel class sang tak hmuh tur a awm lo a, inkhel hmuhnawm tak erawh phochhuah a ni thung. Team pahnihin inkhel nung tak an lantir a, first half-ah goal lut lo mah se an incho tawk a, goal chance hmuh tur pawh a awm nual.

Second half-ah erawh goal a lut hma a, minute thumnaah Vanlalremkima (Tetea) corner pet chu David-a'n a tauh goal a, Electric Vengin 1-0 in hma an hruai. BVT an beidawng mai lo, minute 55-naah Laldinliana Varte freekick pet chu C. Laldintluanga'n a tauh lut a, inkhel a nung sawt.

BVT goal bawh a na zawk a, goal chance pawh a tam - Shalom Lala'n ṭha taka lakluh hnuah goal zawnah a pet thei lo. Electric Veng buaina belhchhah turin Tetea chuan ṭul lo taka Shalom Lala a rah luih avangin minute 64-naah referee-in thutlukna dik siamin EFC midfielder hi red card a pe.

Amaherawhchu, player 10-a khel chungin Electric Vengin an la nawr ngam a, Sawmtea corner pet chu minute 77-naah a tauh lut a, chakna goal a ni zui nghal bawk.

Semifinal chu...

Electric Veng dinhmun hi MPL5-a Bethlehem Vengthlang chet dan nen khaikhin theih a ni a, tun season a Mizoram Police coach Lalbiaksanga Colney enkawlna hnuaiah BVT-in match nga khelhah point 13 an hlawh chhuak.

MPL5-ah hian BVT hi semifinal lut tura rin ni lo mah se season bul an ṭan

ṭhat avangin knockout stage thlen an harsat lo a, BS-a hote hi final lut zo ta lo mah se league round-ah erawh pakhatna an ni hial. Electric Veng pawhin BVT hnung an zui dawn niin a lang a, amaherawhchu semifinal thleng tur chuan match kua khelh hmabakah hian point hmuh belh erawh a la ṭul ang.

Engtin zel?

Electric Veng coach Vanlalsawma Colney chuan, "Keini chuan semifinal kan la beisei ngam lo a, hemi chungchang hi sawi pawh kan la duh rih lo. Keini chuan kan khelh leh tur Chhinga Veng chungchang chauh kan ngaihtuah ang," tiin Vanglaini a hrilh.

BVT an hneh ṭum hian Electric Vengin ṭantu an ngah a, tlang lamah an ṭhahnem hle. MPL club thar hian entu nei lo ngat se player 10-a an khelh hnu hian an thawhchhuah a rinawm tawh lo. Hemi chungchang hi sawiin Sawma chuan, "Mipui hi kan chakna a ni a, kan inlungrualna zarah tun hi kan thleng a ni," tiin an thlen chin chu lawmawm a tih thu a sawi.

Electric Veng 2 - 1 Bethlehem VT
EFC : David Lalchhuanawma 48', 77'
BVT : C. Laldintluanga 55'
MoM : David Lalchhuanawma, EFC

56% Ball Possession 46%
8(4) Shots (On Target) 14(3)
0 Woodwork 0
5 Corners 1
2 Offsides 2
1 Yellow Card(s) 2
1 Red Card(s) 0