Indian Super League 5 A hun a thleng dawn ta
India rama football inelna ngaihhlut hlawh ber Indian Super League chu zanin hian khelh ṭan a ni tawh dawn a, ATK leh Kerala Blasters te chu dar 7:30 hian an intawng nghal dawn.
Season dang angin Bollywood star te nena opening ceremony neih ṭhin chu neih a ni tawh dawn lo a, 'football hlang' a ni tawh dawn - he thutlukna hi Indian football ngainatuten an lawm hle.
Pathianni zan dar 7:30-ah inkhel a awm dawn bawk a, hei hi a hmuhnawm dawn - nikum final-a intawng Bengaluru FC leh Chennaiyin FC te an inkhel ang.
Mizo 22 telna
Mizo player-ten Indian football an thunun chho mek zel a, kuminah pawh Mizo player 22 ngawtin Indian Super League hi an khel dawn. ISL-a la inlan ngai lo Mizo player pasarih ngawt an inlan thar dawn a ni.
Hetihrual hian season hmasaa ISL squad-a awm, kumina inlan lo tur player pathum an awm a, Lalrindika Ralte, Lalchhawnkima leh Lalṭhakima te kumina ISL squad-ah an tel tawh lo.
Lalchhawnkima hi season hmasa khan Mumbai City-ah a awm a, season tawp lam chu Aizawl FC-ah loan-in a khel chhuak. Kuminah pawh ISL lamah kir tawh loin Mohun Bagan a pan.
Lalṭhakima hi season hmasa ṭan dawn khan Kerala Blasters squad-ah awm mah se reserve-ah dah chhunzawm a ni a, reserve team lamah hian hun a hman chhunzawm ang.
Khawiah nge Didika?
India rama midfielder langsar ber pawl ni ṭhin Lalrindika Ralte-in hliam vangin khelmualah hun a hmang tam tawk lo ṭhin a, hetichung hian ISL zawng zawngah a la tel vek.
Mahse, season hmasaa NorthEast United tana khel midfielder hian kuminah erawh ISL hnuchhawnin I League lam a pan a, tun hnaia pawisa ngah thar leh a hmangaih hmasa East Bengal tan a khel.
Mumbai City leh ATK tan pawha lo khel tawh midfielder hian East Bengal hi I League nomawi a la chawipui lo a, 2016-17 season khan, "I League hi tawp mai thei dinhmuna a din avangin East Bengal hi champion pui ngei ka duh a ni," tiin Vanglaini a lo hrilh tawh.
Kuminah erawh Mizo tlangvalin hun ṭha a nei leh ta a, I League-a East Bengal champion pui chu a thil tum tur a ni ang.
Player thar chu
Season hmasa ISL-a inlan lo zingah Laldinliana Renthlei, Zonunmawia, Lalhmangaihsanga, K. Lalṭhathanga, Jakob Vanlalhlimpuia, Ricky Lallawmawma leh H. Lalmuankima te an inlan dawn.
Chennaiyin FC chuan Dinliana hi Chhinga Veng FC aṭangin an lei a, Armed Veng South defender hi season hmasa khan Aizawl FC-ah loan-in a khel. Chennai club hian junior team lama awm ṭhin Zonunmawia chu senior team-ah an hlangkai bawk.
Armed Veng rawlthar Lalhmangaihsanga chu FC Goa academy-ah awm zet mah se coaching staff mit a tlun avangin senior team-ah dah a ni. DSK Shivajians tana khel tawh, season hmasaa Aizawl FC player Lalṭhathanga chuan NorthEast United a pan.
Pune City-in Chanmari FC striker Jakob Vanlalhlimpuia an lalut a, hei hi Mizoram Premier League club nen thawhhona an neihsa hmanga an kalpui a ni.
Mohun Bagan defender Ricky Lallawmawma'n ATK a pan a, Kolkata club-ah hian H. Lalmuankima'n a zui bawk. MK-a hi season hmasa khan FC Goa chuan season laihawlah an lo lalut tawh a, mahse Aizawl FC lamah loan-a kir lehin ATK tan a khel dawn ta.
Khawiah nge Mizo?
Mizo player zingah Jeje Lalpekhlua leh Jerry Lalrinzuala te chuan Chennaiyin tan bawk an khelh chhunzawm dawn a, Bengaluru FC aṭangin Zohminglian Ralte leh Pune City aṭangin Isaac Vanmalsawma ten an zawm ve leh bawk.
Delhi Dynamos tan Lallianzuala a khelh chhunzawm dawn a, Bengaluru aṭangin Daniel Lalhlimpui-a chuan a zawm ve bawk. Lalthuammawia'n a hming chherna Bengaluru chhuahsanin FC Goa a pan a, first choice goalkeeper nih theih a beisei.
Jerry Mawihmingthanga (Jamshedpur), Lalruatthara (Kerala Blasters), Robert Lalthlamuana & Lalrempuia Fanai (NorthEast United), Lalchhuanmawia Fanai (Pune City) te an sukna ngaiah an su ang.
Lalhmangaihsanga Ralte chuan Delhi Dynamos chhuahsanin ATK a pan a, Bengaluru rawlthar Malsawmzuala'n Kolkata club hi a pan ve bawk.
# Bengaluru (1)
1 Sairuatkima Defender Dawrpui Vengthar
# Chennaiyin FC (6)
1 Jeje Lalpekhlua Striker Hnahthial
2 Zohmingliana Ralte Defender Ramhlun South
3 Jerry Lalrinzuala Defender Bethlehem
4 Isaac Vanmalsawma Midfielder Hnahthial
5 Laldinliana Renthlei Defender Armed Veng South
6 Zonunmawia Midfielder Champhai
# Delhi Dynamos (2)
1 Lallianzuala Chhangte Forward Lunglei
2 Daniel Lalhlimpuia Striker Serchhip
# FC Goa (2)
1 Lalthuammawia Ralte Goalkeeper Champhai
2 Lalhmangaihsanga Defender Armed Veng
# Jamshedpur FC (1)
1 Jerry Mawihmingthanga Midfielder Chanmari
# Kerala Blasters (1)
1 Lalruatthara Defender Hmunhmelṭha
# NorthEast United (3)
1 Robert Lalthlamuana Defender Khawzawl
2 Lalrempuia Fanai Midfielder Lunglei
3 K. Lalthathanga Midfielder Bethlehem Vengthlang
# Pune City (2)
1 Lalchhuanmawia Fanai Defender Lengpui
2 Jakob Vanlalhlimpuia Striker Hnahthial
# ATK (4)
1 Lalhmangaihsanga Ralte Defender North Mualcheng
2 Ricky Lallawmawma Defender Durtlang
3 Malsawmzuala Midfielder Chaltlang
4 H. Lalmuankima Forward Bawngkawn
–––––––––––––––––––––––––––––––––––––––––––––––––
Note : ISL club zingah Mumbai City chuan Mizo player an nei lo