Zonet-ah Mizo boxer ṭhate inhnek a en theih dawn ; Johnkenty, Sangtea, NT-a & Dinga
Mizo boxer ṭha pali Lalrinsanga Tlau, Nutlai Lalbiakkima, HC Johnkenty Vanhlimpuia leh Laldingliana te chu February 26, Inrinni zan hian Dubai-ah an inhnek dawn a, Zonet-ah a en theih dawn. Grassroot Boxing Promotions & Management chuan Dubai-ah 'India Vs Pakistan' hming vuahin inhnek lian tham an buatsaih dawn a, Mizo boxer palite hi an tel dawn.
Nimin chawhnu khan Regency Hotel-ah Grassroot Boxing-in Dubai-a boxing inelna awm tur chungchangah press conference an ko a, Grassroot Boxing dintu Mujtaba Kamal chuan Mizo mipui tan boxing ṭha tak an chhawpchhuah tur thu leh an hnuaia Sangtea, NT-a, Johnkenty leh Dinga te an awm thei chu lawmawm a tih thu a sawi.
India vs Pakistan
Grassroot Boxing hian India mipuite ngaihven theih turin tun ṭum inhnek hi 'India vs Pakistan' hming an vuah a, Mizo boxer bakah hian Indian boxer dang Kolkata boxer Faizan Anwar, Bengaluru boxer Rakesh Krishnan leh Manipur boxer Shaikhom Rebaldo te an inlan bawk dawn.
Manipur hmeichhe boxer Sarjubala Devi pawh a inlan dawn a, amaherawhchu a khingpui turah Pakistan an awm dawn loh avangin 'India vs Pakistan' huang chhungah dah tel a ni lo.
Mujtaba Kamal chuan, "Inhnek ṭha tak chhawp chhuah kan tum a, boxer ṭha hmachhawn se kan duh. NT-a pawhin min biak hmasa bera a sawi chu boxer ṭha a duh tih a ni a, world champion nih a duh chuan a elpui tawk a tum a ngai a ni," tiin a sawi.
Khingpui chungchang sawiin Siaha boxer NT-a chuan, "Gerrtipong Kumsahwat kha ka beisei ang a ni lo a, kan inpuahchahna phu khawpin a hnek tham loh. Tha pui thawh ila, round khatnaa knockout theih a ni. Mizo mipui pawhin an sawisel nasa tih ka hria a, ka tan pawh hriat a nuam lo. Kamal-a bulah pawh boxer ṭha ka duh tih ka hrilh. Ka khingpui tur Fida Muhammad hi YouTube-ah a inhnek hmuh tur a awm a, lo en ru. A hnek tlak khawp ang," tiin Vanglaini a hrilh.
Zonet-ah a en theih
Nikum November 27 khan LPS Fight Night-ah NT-a leh Dinga bakah Mizo boxer dangte an inlan a, inelna buatsaihtu hi LPS leh Marine Pro Boxing Promotions te an ni. NT-a leh Dinga hi Marine Pro Boxing hnuaiah a awm.
NT-a leh Dinga te hian Sangtea awmna Grassroot Boxing an zawm a, professional fight luhchilh thar tur Johnkenty-a'n a rawn zawm bawk. Grassroot Boxing hian Zonet nen inremna an neih avangin Dubai-a inhnek tur hi Zonet-ah a en theih dawn.
IBA intercontinental title kawltu NT Lalbiakkima chuan, "Thailand-a inhnek turin inbuatsaihna kan nei a, amaherawhchu inelna hi kaltlangpui a nih theih tak loh avangin inhnek theihna tur kan zawng. Boxer tan chuan inhnek tam hi a pawimawh a, Marine Pro Boxing leh LPS te pawhin an hrethiam ang," tiin thutlukna an siam chhan a sawi.
Khawruhlian tlangval Sangtea hian nikum October 23, Inrinni khan Dubai-ah technical knockout hmangin Georgian boxer Ilia Beruashvili a hneh. Hemi ṭum hian Zonet-ah tihchhuah a ni a, Sangtea hian Pay Per View aṭangin Rs 2,15,150 a dawng. Mizo boxer-in a chan tam chhan hi Zonet-in an chan ai Rs 2,01,250 an pek vang a ni.
Sangtea chuan, "Tun hun ṭha hi Zonet chunga lawmthu sawi nan hman ka duh. Nikuma Dubai-a ka inhnek ṭum khan Zonet hian an chan ai min pe vek a, an chungah ka lawm takzet a ni," tiin a sawi.
Eng zat nge an hlawh dawn?
Grassroot Boxing Promotions & Manage-ment-in Mizo boxer ṭha pali Lalrinsanga Tlau, Nutlai Lalbiakkima, HC Johnkenty Vanhlimpuia leh Laldingliana te an hnuaia awm theih nan inremna an neih a ṭul. Mizo zinga professional boxer hmasa ber Sangtea hian Dubai-a an inhnek hnuhnun ber khan euro 50 (Rs 4,330.33) leh dirham 3,000 (Rs 6,1187.89) a dawng a, fighter of the night a thlan a nih avangin dollar 1,000 (Rs 74920.50) a dawng leh bawk.
Dubai aṭanga inhnekna bik aṭanga a sum hmuh hi Rs 1,40,400 bawr vel a ni a, PPV leh sponsor aṭanga a sum hmuh nen phei chuan inhnek vawi khatah Rs 3,55,500 bawr vel a hmu chhuak. Tun ṭumah hian Sangtea hian dollar 3,100 (Rs 2,31,802.50) a hlawh dawn a, PPV aṭangin 8% a chang bawk ang. Siaha boxer NT-a hian Thai boxer Gerrtipong Kumsahwat a hneh ṭum khan dollar 2,000 (Rs 1,49,550) a hlawh. Tun ṭumah hian dollar 3,000 (Rs 2,24,325) a hlawh dawn a, PPV aṭangin 7% a chang ang.
Johnkenty tan professional fight hmasa ber tur a ni a, dollar 1,500 (Rs 1,12,162.50) a hlawh dawn a, PPV aṭangin 7% a chang ang. Tuipui tlangval Johnkenty hi National-ah pawh silver medal vawi hnih hlawh chhuak tawh a ni. Boxer pathumten round ruk an fight dawn a, Tuipui boxer Dinga'n round li a fight thung ang. Dinga hian dollar 1000 (Rs 74,775) a hlawh dawn a, PPV aṭangin 2% a chang bawk ang.