City-ah Cancelo a cham chhunzawm dawn

Manchester City fullback ṭha mi Joao Cancelo chuan Etihad Stadium-ah kum nga daih contract thar a ziak a, kum 2027 thleng Premier League club tan hian a khel dawn tihna a ni.

Portugal international hian kar khatah £80,000 a hlawh mek nia sawi a ni a, kum 2025 thleng cham turin contract a nei bawk. Khawthlang media-te chuan a contract tharah hian a hlawh tihpun a nih thu an sawi a, a punna zat erawh tarlan a ni lo.

Kum 27 mi Cancelo hian kum 2019 khan Juventus aṭangin City hi a zawm a, Pep Guardiola enkawl team tan inelna hrang hrangah match 106 khel tawhin goal sarih a khungsak a, assist vawi 14 a nei - Premier League (1) leh League Cup (2) ah a champion pui bawk.

Kum 27 mi Cancelo chuan, "Contract thar ka ziak thei hi ka hlim takzet a, he hmun aia football khelhna tura duhthlan tur a awm chuang lo. City player-te hian kan theihna sang bera khel chhuak tura mamawh ang chu kan nei kim vek a ni.

"Hmanrua leh hmun hma kan nei ṭha em em a, world class team mate te nen khel hoin, hma kan sawn theihna tur atana min fuih rengtu manager kan nei bawk a ni," a ti.

Cancelo chuan sawi zawmin, "He hmuna ka awm thei hi ka lawm. Ka career a tawp hmaa tihhlawhtlin duh tam tak ka nei a, Manchester City hi chung ka duhte ka tihhlawhtlin theih nana hmun ṭha ber chu a ni," a ti - tun season inelna hrang hrangah match 30 khelin goal thum a khung a, assist vawi riat a nei bawk.

City director of football Txiki Begiristain chuan, "Joao hi professional dik tak a ni. Football hi a hmangaih em em a, ni tin mai hian hmasawn duhin a bei a ni ber. Entawn tur ropui tak a hnutchhiah a, player naupang zawkten hlawhtlin an duh a nih chuan entawn rawh se," a ti a, Cancelo a dah sang hle.