AFCON Semifinal: Cameroon vs Egypt- a hmuhnawm dawn

Africa Cup of Nations semifinal thawh hnihna chu zaninah khelh a ni dawn a, inelna thlengtu Cameroon leh champion ngun ber Egypt te chuan zanin dar 12:30-ah final luh an inchuh dawn - a hmuhnawm loh ring suh.

Egypt thiampuipa Mohamed Salah chuan, "Cameroon nena kan inkhel tur chauh ngaihtuah tur a ni a, tunah chuan final sawi a la hun lo," a ti a, Liverpool forward hian a ṭhiante chu fimkhur turin a chah.

Cameroon-in fan-te puihna nen Egypt hneh theih ngei an inbeisei ang a, Salah neitu Egypt hian nomawi chawi loa Cameroon hawsan an duh lo ang - vawi sarih lai champion tawh team hi kum 2010 hnu khan an champion leh tawh lo.

Fimkhur a ngai
Cameroon-in Samuel Eto'o te hunlai angin squad an nei chhah tawk lo a ni mai thei a, mahse, tun AFCON-a team tum châkawm lo ber pawl thlang dawn ta ila Cameroon hi kan thlang thei hial ang - Egypt tan fimkhur a ṭul tihna a ni.

Tlarhmaah Al-Nassr striker Vincent Aboubakar hian tun inelnaah goal ruk a khung tawh a, Lyon forward Karl Toko Ekambi hian goal nga a khung tawh bawk - tun tournament-ah na na na chuan anni aia tlarhma hlauhawm an awm chuang lo.

Si ban nghak turin Ajax keeper Andre Onana a awm a, Al Tai defender Collins Fai, Nantes right back Jean-Charles Castelletto, Gent centre back Michael Ngadeu-Ngadjui leh Seattle Sounders left back Nouhou Tolo te ho nena an inkawp hian Salah leh a ṭhiante an dang thei ang em? Kan hre thuai dawn e.

Hei le Egypt
Egypt-in tlarhmaa Salah an neih chu an chhuan ber a ni a, Liverpool forward thlawp turin VfB Stuttgart forward Omar Marmoush leh Galatasaray forward Mostafa Mohamed an awm bawk - Cameroon tlarhnung ṭhiat turin an ṭha tawk.

Salah chuan, "Kan mamawh ang takin ka ṭhiante an khel chhuak zel thei a, a sang thei ang ber kan thlen theih nan an theihna zawng zawng an hlan ṭhin a ni," a ti a, mimal thiamna aiin thawhhona ṭha chu an thupui a nih thu a sawi.

Egypt hian midfield-ah pawh Aston Villa midfielder Trezeguet leh Arsenal midfield tawnhriat nei ṭa Mohamed Elneny te ho an nei a, West Brom defender hlui Ahmed Hegazi leh defender ṭhangduang Mohamed Abdelmonem te ho an nei bawk. Mahse, si ban nghak turin first choice Mohamed El Shenawy leh second choice keeper Gabaski te an inhliam a, third choice Mohamed Sobhy a luh a ngai dawn.

Beiseina
Egypt coach Carlos Queiroz-a'n an match hmasa berah a team hi Nigeria lakah 1-0 in a tlawmpui a, sawiselna a tawk nasa hle. Mahse, Guinea-Bissau leh Sudan hneh zuiin last 16 an lut a, semifinal thleng turin team ṭha Ivory Coast leh Morocco an pet chhuak zui - sawiseltute pawh an ngawi leh tawh.

Portuguese coach tawnhriat nei ṭha chuan, "Africa-a team ṭha ber pawl kan tum dawn a, kan tan chuan a awlsam lo ang. Ka ṭhianpa Antanio Conceicao enkawl team tum tur kan ni a, tun hun min hruai thlengtu duhna tak tak thinlung nen khan kan khelh leh a ngai ang," a ti.

Egypt semifinal kalkawng en ila, knockout stage-a Comoros leh Gambia hnehtu Cameroon aiin an zinkawng a hautak zawk tih a lang a, zaninah pawh Cameroon hneh theih ngei an inbeisei ang - mikhual huaisen nge mualneitu dingchang dawn? Kan hre thuai dawn e.

Semifinal
February 2, Nilaini Zan
(Result kan hre hman lo)
Burkina Faso 12:30 AM Senegal

Zanin Inkhel Tur
Cameroon 12:30 AM Egypt