Infiammi ropui Brady a chawl ta

American football legend Tom Brady chuan Thawhlehni zan khan a chawlh thu a puang a, kum 44 mi quarterback ṭha mi hi infiammi ropui bera ngaitu pawh an ṭhahnem hle.

Brady hian season 22 chhungin Super Bowl-ah vawi sarih hnehna a chanpui a, New England Patriots vawi ruk a champion pui hnuin Tampa Bay Buccaneers a champion pui leh bawk.

Buccaneers quarterback hian kum khat contract a la nei chungin inelnaah a rilru zawng zawng a pek theih tawh loh avangin a chawlh thu hi a puang.

Football a mangṭha
Brady hi kum 44 mi a ni tawh chungin tun season-ah pawh a la khel ṭha a, record hrang hrang siam chhoin a club khelhna Tampa Bay Buccaneers pawh playoff a thlenpui.

Playoff-ah Los Angeles Rams hmachhawnin 27-3 a an hnufual hnuah Brady hoin Tampa Bay-in 27-27 in an nihrual thei a, Rams hi 30-27 in chak zawk ta mah se Brady la ropuizia pholanin a awm.

Buccaneers quarterback Tom Brady chuan, "Ka thlirnaah chuan infiamnaah hian 100% pek a ngai a, chumi tel lo chuan a hlawhtlin theih loh. Taksa, rilru leh ngaihtuahna zawng zawng sen a ṭul a, kum 22 chhung khan ka theihna zawng zawng ka hlan. Hlawhtlinna hi awlsam taka neih theih a ni lo.

"Hei hi a harsa lai chu a ni a, mahse thutlukna siam a ṭul ta si. Tunah chuan inelna sangah ka rilru zawng zawng ka pe thei tawh lo. NFL career hi ka hmangaih a, tunah chuan thil danah ka hun leh tha te ka sen a ṭul tawh a ni," tiin a chawlh thu a puang.

Pick no. 199 to GOAT
Tom Brady hi August 3, 1977 khan San Mateo, California-ah a piang a, a bul ṭan dan aṭanga a tawp thlengin a chanchin a ngaihnawm. College football hi Michigan tan a khel a, NFL draft 2000-ah khan a tel.

Draft-ah hian vawi 199-naah New England Patriots-in an thlang chauh a, amah aia thlan hmasak player 198 an awm tihna a ni. NFL-a a luh rualpuiah pawh tluk loh a ngah tihin a sawi theih.

Mahse, Brady hian inrintawkna a ngah hle. American sumdawng hausa leh Patriots neitu ni bawk Robert Kraft chuan, "Kraft chibai, tiin a nihna sawi a tum. Tom Brady, tunge i nih ka hria e. Round ruknaah an thlang che, tiin ka hrih. Chutah chuan ka mitah min en a, he club-in an player a thlan tawh a, thutlukna a la siam ṭhat ber ka ni ang, tiin min hrilh," tiin an inbiakna hmasa, tun hnuah a sawi chhuak. Hei hian Brady inrintawkzia a sawifiah.

Brady hian Patriots hi Super Bowl-ah vawi ruk a chakpui a, NFL history-ah Super Bowl-a vawi ruk chak thei chu Patriots leh Pittsburgh Steelers te chiah an awm. Patriots hi Brady ho vekin an chak a, hei hian a ropuizia a sawifiah.

Super Bowl-ah Brady hi vawi nga MVP-ah thlan a ni a, NFL Most Valuable Player-ah ṭum thum thlan a ni tawh a, record hrang hrang ṭhahnem tak a nei.

A ropui belhchhahna chu a daih reina hi a ni a, kum 2020 khan Tampa Bay Buccaneers zawmin kum 42 mi a ni tawh. Brady hian Tampa Bay hi kum 2002 hnua a vawi khat nan Super Bowl-ah a chakpui a, American football khel tawha ropui ber 'GOAT' tiha chhal hi a phu. Pick number 199 aṭanga player ropui ber a ni thei hian a football zinkawng ngaihnawmna a belhchhah.

Chhungkaw tan
Tom Brady hian khawvela model lar ber zinga mi Brazilian model Gisele Bundchen chu February 26, 2009 khan nupuiah a nei a, an pahnih inkarah hian fa pahnih Benjamin Rein leh Vivian Lake te an nei. Brady hian a bialnu hmasa Bridget Moynahan nen fa mipa John Edward Thomas Moynahan a nei bawk.

Brady chuan, "Ka chhungte leh ṭhian ṭha zawng zawng chungah min thlawpna avangin ka lawm takzet. In tel lo chuan football tan kum 30 chuang hi ka hmang thei lo ang. Ka tana inhlutna hi ka thungrul thei dawn lo a, ka hmangaih che u.

"A tawp berah chuan ka nupui Gisele, ka fate Jack, Benny leh Vivi te chungah ka lawm. Anni hi beiseina min siamtu an ni a, chhungkaw ṭha tak ka din hi hlawhtlinna ropui ber a ni. Khelmualah hun ka hmang tam a, in lamah ka chhungte hian min thlawp ṭha. Anmahni vangin ka hun pum football tan ka hlan thei a, tun hun ka thlen theih chhan hi anmahni vang a ni," tin a sawi.