American-te ngaihhlut 'American football' chu

Tom Brady ropuina hi American football a ni a, United States-ah chuan Mizorama football an hriat chian aia nasain an hre chiang. Amaherawhchu khawvel hmun dangah erawh a ropui dan hrefiah tur chuan a bul ṭhut aṭanga sawifiah a ṭul ang.

American football
United States-ah chuan helaia football tiha kan hriat lar hi soccer tih a ni a, an ngaisang tehchiam lo. Kum 1994-a US-in World Cup an thlen hnu aṭang khan nasa takin hma a sawn a, chutichung chuan American football, baseball, basketball leh ice hockey te nen khaikhin rual a ni lo.

American football hi US-ah chuan en hlawh bera chhal a ni a, inelna sang ber National Football League tel pha chin chu infiammi hlawhtling tiha chhal theih an ni. NFL khel pha tur hian College Football an khelh phawt a ngai a, chuta ṭang chuan 'draft' hmangin NFL club-in an la ṭhin.

Draft-ah hian player ṭhahnem tak an awm a, NFL team-ten an inthlak chhawk ṭhin. India rama cricket inelna ngaihhlut Indian Premier League-a 'auction' ang thoin 'draft' hi player lakna hun a ni a, chutihrualin a kalphung erawh a inang lo.

NFL-a champion zawnna hi Super Bowl tih a ni a, khawvel huapa inelna ngaihhlut niin zaithiam lar tan pawh Super Bowl-a zai phak chu hlawhtlinna a tling. Kum 2020 china halftime show inlante chu Shakira, Jennifer Lopez, The Weeknd, Dr. Dre, Snoop Dogg, Eminem, Mary J. Blige leh Kendrick Lamar te an ni a, an lar em em vek a ni.

Quarterback chu
American football-ah hian football ang thoin mual chhungah player 11 an awm ṭhin a, chutihrualin matchday-a player insiam thei zat chu 48 daih a ni. Team-ah offence leh defence team an awm hrang a, position hrang hrang a awm.

Position zawng zawnga ngaih hlut ber chu offence-a team hotu quarterback a ni a, team pumpui khaipa anga chhal a ni. Quarterback ṭhain team a chakpui thei a, ball semtu an ni satliah lo a, an khelh dan hmang 'set play' a thutlukna siamtu an nih ṭhin avangin an pawimawh takzet.

Cricket en ṭhin chuan captain pawimawhna an hrechiang a, an thuzia pawh an hre ang. American football-a quarterback hi cricket-a captain ai mah hian an la pawimawh zawk a, khawvel huap pawha American football player lar hi chu quarterback an ni deuh zel a ni.