Colombia dinhmun a derthawng
Player ṭha nei nual mah se Colombia chu Qatar World Cup khel phak lo thei dinhmunah an ding mek, khelh hmabak pahnih an la neihah chak ve ve pawh ni se, an chunga awmte chetsual an chan tel a ngai tawh dawn.
South America aṭangin Brazil leh Argentina an tling chiang tawh, pathumna Ecuador chuan a chhe berah playoff an khel phak dawn. Uruguay, Peru, Chile leh Colombia ten hmunruak pahnih la awm chu an in chuh dawn tihna a ni.
Ram 10 inel zinga a sang pali ten Qatar panna ticket an nei nghal dawn, pangana chuan playoff an khelh dawn. Inter-confederation playoff-ah hian South American ramte an chak tlangpui a, ticket panga an nei anga sawi theih a ni bawk.
Colombia an buai
Nimin zing khan Argentina chuan Lautaro Martinez-a goal khat hmangin an mikhual Colombia hi 1-0 in an lo hneh, chak lo Reinaldo Rueda naute hi team 10 inel zingah pasarihna an ni, khelh hmabak pahnih chauh an nei tawh.
Colombia hian chak ngei an mamawh tih hre chungin Argentina an hmachhawn, tlarhma lamah Liverpool lei thar Luis Diaz leh James Rodriguez an nei a, Juventus winger Juan Cuadrado an neih bawk avangin an chhe lo.
Mahse, Tottenham defender pawimawh Davinson Sanchez leh a ṭhianten Inter Milan striker Martinez an dang thei lo. Bench aṭanga Radamel Falcao luh hnuah pawh an sut theih loh avangin dinhmun derthawng taka ding chungin an haw a ngai.
Match 29 chu
Argentina hian an match hnuhnung 29 zetah tlawm an nei ta lo. World Cup khel tura an tlin chian tawh hnuah pawh La Albiceleste hian inthlahdah an tum chuang lo, captain Lionel Messi-a chawlh pe mah se an hma a awm chu an ngam zel.
Colombia lakah keeper Emiliano Martínez-a'n a hna ṭha takin a thawk leh a, Aston Villa keeper hian ram tan match 16 a khelh tawhah a chak lo zawkah an la ṭang miah lo, clean sheet vawi 10 a nei tawh - World Cup-ah pawh a hmel kan hmu ngei dawn.
Argentina winger Angel Di Maria chuan, "Tute nge khelmual chhunga lut a pawimawh lo, ram aiawh a khelte hian theih tawp kan chhuah," a ti. Messi bakah hri leng vangin midfielder pawimawh Rodrigo De Paul khel thei lo mah se an buai phah lo a ni.
Mangṭha Paraguay
Beiseina tlemte nei chungin Paraguay chuan Brazil an hmachhawn, an khingpui hi world champion vawi nga ngawt ni tawh an nih avangin an tan tih ngaihna a awm lo - Tite naute hian 4-0 ngawta sawpin an beiseina an tih tawpsak.
Brazil tan Raphinha, Philippe Coutinho, Anthony leh Rodygo ten goal khat ṭheuh an khung a, point 39 hmuin table chung berah an awm. Brazil hian tun qualifier bikah hian match 15 khel tawhin tlawm an la nei lo.
Paraguay erawhin point 13 bak an la hmu lo, table-ah a hniam ber dawt an ni; an hnuaiah Venezuela chiah an awm. Khelh hmabak pahnih an la neihah chak ve ve in, an chunga mite chak lo vek pawh ni se pangana ni lai Peru an umphak thei tawh lo.
Inkhel dang
Nimin zing inkhel dangah Uruguay chuan Venezuela 4-1 a hnehin World Cup khelh phak ngei an la tum, world champion hmasa ber hi palinaah an in vawrh chhoh tak avangin midang result ngaihchan tel an ngai tawh lo, an hma hun chu an kutah a awm.
Diego Alonso enkawl Uruguay hian an hmabakah Peru leh Chile an la hmachhawn leh dawn, anmahni ang bawka beisei la nei ve ve an nih avangin chetsual erawh a thiang dawn lo, an hnuaia awm Peru an hneh erawh chuan match hnuhnung ber khelh hmain an tling dawn thung.
Tun hnaiah Alexis Sanchez a rawn khel ṭha chho leh tawh. Inter Milan forward hian club leh ram tan goal a khung zel, nimin zingah pawh goal hnih khung lehin Chile chu Bolivia lakah 3-2 in hnehna a chanpui.