Syria ngamtu South Korea-in World Cup khel dawn

FIFA World Cup (Asia) qualifier-ah match thum khelh tur la awm mah se South Korea chu um phak theih an ni tawh lo a, Iran hnungzuiin World Cup khel turin an tling ve leh ta - World Cup khel tura a zawna vawi 10 an tlinna a ni a, World Cup 1986 aṭang khan football inkhawmpui ropuiah hian an la tel ziah tihna a ni.

South Korea hian Thawhlehni zan khan Syria chu 2-0 in an hneh a, Kim Jin-su leh Kwon Chang-hoon ten goal khat ve ve an khung. Group A-a pathumna United Arab Emirates tan South Korea hi um phak theih an ni tawh lo.

Group B inkhel ngaihven hlawhah Japan chuan tlawm la nei lo Saudi Arabia chu 2-0 in an hneh bawk a, Takumi Minamino leh Junya Ito ten Japan tan goal an khung - Saudi Arabia aiin point khat chiahin an hniam tawh a, World Cup khel tur erawh a la chiang thei lo tung.

Hetihlai hian Australia chuan rin loh takin Oman chu 2-2 in an inhnehtawkpui a, group B-ah pathumna an ni chhunzawm - pahnihna Japan chu point thumin an phak lo mek a, match hnih chiah khelh tur a awm tawh. Group A leh B-a pahnihna chin ve vein automatic-in World Cup an khel dawn tih theihnghilh loh a ṭha.

A awlsam
South Korea-in World Cup an khel dawn em? tih ai chuan, "Engtikah nge an hmun an tihchian theih dawn?" tih chu zawhna zawk a ni a, he zawhna pahnih hi Thawhlehni zanah chhan felin a awm ta.

First half-ah South Korea-in goal khung lo mah se second half-ah erawh dan theih an ni tawh lo a, minute 53-naah left back Kim Jin-su chuan goal hmahruai a khung.

South Korea-in an duhtawk mai lo. South Korea sipai club Gimcheon Sangmu tana khel Kwon Chang-hoon chuan minute 71-naah goal hnihna a rawn khung ve leh a, Syria lamin a chhanletna tur an nei lo.

Hetihlai hian World Cup khel tura tling chiang tawh Iran chuan Mehdi Taremi goal hmangin UAE chu 1-0 in an hneh a, UAE hian point 11-in South Korea an phak tawh lo - fourth round hmachhawn leh a, inter-confederation playoff hmanga inpettling chu World Cup an beisei theih dan awmchhun a ni tawh.

Japan an chak
October thla khan Japan-in Saudi Arabia an ngam lo tawh a, an ngam lo nawn leh a nih ngat chuan an tan mualphona a nih bakah an World Cup zinkawng a hautak sawt bawk ang - mahse, a hunah tak Japan an rah.

Liverpool forward Takumi Minamino chuan minute 31-na lekah Ito siamsak chu goal hmahruai ni turin a khung a, Belgian club Genk winger Ito hian minute 50-naah a belhchhah ve leh bawk - Japan tan World Cup a hnai ta hle.

Hetihlai hian Australia erawh Oman lakah vawi hnih ngawt hma hruai mah se, an mikhualna ramah si phurh an sut zawhtir zel a, 2-2 in an chak zo lo - Jamie Maclaren (penalty) leh Aaron Mooy-ten vawi hnih ngawt Australia hi hma an hruaipui a, mahse, Oman tan Abdullah Fawaz chuan si phurh a sut zo zel a ni.

Match hnih chiah khelh tur awm tawhah Australia-in Japan leh Saudi Arabia an hmachhawn dawn a, a awlsam dawn lo - a êng zawnga thlir chuan an elpui ve ve an tum dawn a, an chak ve ve theih chuan World Cup khel turin an tling daih thei!