A tawpah Goa an vannei

Thawhlehni zan Indian Super League inkhelah FC Goa leh Odisha FC te chu 1-1 in an inhnehtawk a, inkhel pumpui thlirin Odisha hi vannei zawk angin lang mah se hun pek belha si phurh sutna goal khungtu FC Goa hi vannei zawk tih loh thei an ni lo.

Goan club-in 60% zet ball changin vawi 20 zet shot nei mah se a pawimawh ber goal an khung thei lo a, Odisha-in minute 61-naah penalty an hlawh chhuak thung - Jonathas Cristian chuan hei hi goal-ah a chantir a, 1-0 a ni.

FC Goa-in goal an chhuah hmain hun duhawm an nei a, mahse, Alberto Noguera chuan yard ruk vel leka hla aṭangin a pet goal thei lo a, Makan Chote chuan woodwork a tih per bawk.

Odisha tan Jerry Mawihmingthanga'n chance duhawm nei mah se a hun ṭha neih goal-ah a chantir thei lo a, Chanmari tlangval hian Goan keeper Naveen Kumar pet khum mah se ball-in bar a per a, a vanneih zan a ni lo.

Goal dang lut loin Odisha hi an chak mai dawn niin a lang hman. Mahse, hun pek belh minute linaah Alexander Jesuraj a inlar a, minute 85-naa luhtir forward hian Goa tan goal khungin a team tan draw result a hlawh chhuak - Odisha leh Goa tan semifinal beiseina a la bo lo tih hriat a ṭha.

Odisha tan Jerry bakah Lahrezuala Sailung leh Isaac Vanmalsawma ten inkhel bul an ṭan a, Hrezuala leh Isaac hi Mizo player tho Lalruatthara leh Paul Ramfangzauva ten an thlak.