Mangṭha Covid; Premier League club-in sum an seng hnem!

Covid-19 nghawng avanga Premier League club-te sum inrenchem boruak a reh a, kalphung pangngai anga sum an lakluh leh meuh chuan transfer bazar-a an sum sen pawh a tam leh ta hle.

Thawhṭanni zan khan Premier League thlasik transfer chu khar a ni a, English top flight club-ten sum an sen belhkhawm chu pound maktaduai 295 a ni- January transfer-a Premier League club-ten sum an sen hnem pahnihna a tling.

January 2018 khan Premier League club-ten transfer bazar-ah pound maktaduai 430 an seng a, tun thlasik transfer hian a dawt - January 2021 khan Premier League club-ten transfer-ah pound maktaduai 70 chiah an seng a, transfer tawp nia an hman zat chu pound maktaduai 10 chiah a ni.

Tunah erawh stadium khatin fans an pungkhawm leh thei tawh a, sumdawnna hrang hrang pawh kalphung pangngai anga kalpui chhoh a nih tak avangin Premier League club-te an harsa tawh lo - an duh ang player an lei e!

Club tenau sum ngah!
Premier League nomawi leh Champions League khelh phak inchuh boruak kara thawm ring ṭhin chu relegation battle a ni a, January transfer-a Premier League club-te sum sen zahve chu a hnuai lama awm club panga Everton, Norwich City, Newcastle United, Watford leh Burnley sen a ni!

Sports Business Group (Deloitte) a an hotupa Dan Jones chuan, "Covid-19 in sum lama Premier League club-te na taka a nghawngna kha a reh ṭan tih a lang a, sum aṭanga teh ngat chuan khawvelah anni aia league lian zawk a awm lo tih Premier League club-ten an pholang a ni," a ti.

European top four league dangten tun thlasik transfer-a sum an sen belhkhawm chu pound maktaduai 317 a ni a, EFL leh Premier League club-te sen belhkhawm aia a sanna chu pound maktaduai hnih chiah a ni.

Premier League club-ten player hralhna aṭanga an sum lakluh chhiar tel loha, an sum thehchhuah ngawr ngawr zat hi pound maktaduai 180 a ni a, kum 2003-a January transfer hman a nih ṭan aṭanga a tam ber ṭum a tling.

Tawpna niah chuan...
Transfer tawp niah Tottenham Hotspur an che na hle - Juventus midfielder Rodrigo Bentancur chuan pound maktaduai 15.9-in Spurs hi a zawm a, a khelh ṭhat dan a zirin a man hi pound maktaduai ngain a san belh leh thei ang. Antonio Conte enkawl team hian £8.3m-in Juventus winger Dejan Kulusevski chu an hawh bawk a, an duh chuan £29.2m-in a nghetin an lalut zui thei ang.

Hetihrual hian Tanguy Ndombele (Lyon), Bryan Gil (Valencia) leh Giovani lo Celso (Villarreal) te chu Spurs hian loan-in an chhuahtir vek thung a, Arsenal forward Pierre-Emerick Aubameyang chuan free-in Barcelona a zawm.

Newcastle-in Brighton defender Dan Burn (£13m) leh Aston Villa left back Matt Targett (loan) te an lalut a, Manchester City-in River Plate striker Julian Alvarez (£14.1m) lalut mah se season tawp thleng Argentine club-ah hian loan-in a cham zui dawn a, Manchester United midfielder Donny van de Beek chuan Everton (loan) a zawm bawk.

Burnley-in Wolfsburg aṭangin striker Wout Weghorst (£12m) an lalut a, Crystal Palace-in striker pahnih Jean-Philippe Mateta (£9m) leh Luke Plange (£1m) an lalut a, Plange hi Derby County-ah loan-in a kir zui. Brighton-in Royale Union Saint-Gilloise forward Deniz Undav (6m) la mah se loan-in Belgian club-ah a kir zui a, Brentford-in Denmark midfielder Christian Eriksen free transfer a an lakluh chu a thawm a ring hle bawk.

January thil thleng
Transfer tawp ni a thlen hmain transfer langsar a awm nual a, Liverpool-in pound maktaduai 37.5-a FC Porto winger Luis Diaz an lakluh chu a langsar ber a ni a, a khelh ṭhat dan a zirin pound maktaduai 12.5 pek belh leh tur a ni ang.

Saudi Arabia sum hmanga insiam len hna thawk mek Newcastle United chuan Lyon aṭangin Brazilian midfielder Bruno Guimaraes (£35m + £6.6m add-ons), Burnley striker Chris Wood (£25m), Atletico Madrid right back Kieran Trippier (£12m) te an lalut a, Everton chuan Rangers right back Nathan Patterson leh Dynamo Kyiv left back Vitalii Mykolenko te manah £27m an seng bawk.

Steven Gerrard enkawl Aston Villa an che na viau a, Everton left back Lucas Digne (£25m) an lakluh bakah Barcelona midfielder Philippe Coutinho (loan), Arsenal defender Calum Chambers (free) leh Dundee United centre back Kerr Smith (£2m) an lalut.

Wolves forward Adama Traore-a'n Barcelona (loan) a pan a, Manchester United-in loan-in Anthony Martial (Sevilla) leh Amad Diallo (Rangers) an chhuahtir a, Wolves chuan loan-a an hawh RB Leipzig forward Hwang Hee-chan chu pound maktaduai 14-in a nghetin an lalut bawk. Juventus-in pound maktaduai 58-a Fiorentina forward Dusan Vlahovic an lei chu European football-a transfer lian tham ber a ni.