Dele Alli-a'n beiseina thar a nei

Tottenham Hotspur aṭanga Everton zawmtu Dele Alli chuan ṭha taka a khelh chhuah theih a beisei a, manager thar Frank Lampard nena thawk dunin hun hlimawm an hman theih ngei a beisei thu a sawi bawk.

Kum 25 mi Alli hi 2018 World Cup khan Gareth Southgate-a koh zingah a tel. Mahse, a hnu lamah Spurs tan a khel mumal lo, hliam a neih bakah Jose Mourinho nen an inmil vak lo, manager thar Antonio Conte pawhin a chhawr zui vak lo.

England tan pawh koh a ni ngai tawh lo a, theihna sang tak nei mah se club tana a hna thawh sawi tur a awm mumal loh miau avangin en kan a hlawh. Tunah chuan Goodison Park aṭanga par chhuah leh a tum dawn a ni.

Alli chuan, "Lampard nen kan inbe tawh, a inkhelh hun lai aṭang tawha ka ngaihsan leh a inkhel lai ka en tam a ni. Ani nena kan thawk dun thei tur hi ka lawm a, thil ropui tak kan tih dun theih ngei ka beisei," tiin a sawi.

Everton hian Alli bakah Manchester United aṭangin Donny van de Beek an la thar bawk a, an insiamrem thei a nih chuan season chawhnu lamah team hmuhnawm an nih theih a rinawm.