FA Cup Fourth Round ; Zaninah Manchester United vs Middlesbrough
Khawvela football inelna upa ber FA Cup chu zanin aṭangin fourth round khelh a ni dawn a, Manchester United-in zanin dar 1:30 hian Old Trafford-ah Middlesbrough an mikhual ang.
Ralf Rangnick-a kaihhruai Man United-in FA Cup bakah Champions League-ah champion beiseina an la nei a, tun season-a nomawi chawi an duh a nih chuan FA Cup hi an lak thutak a ṭul ang.
Greenwood a tel lo
Man United-in thlasik bazarah Donny van de Beek chu loan hmangin Everton-ah an chhuah a, Sevilla-ah loan hmang bawkin Anthony Martial an chhuah bawk.
Rawlthar duhawm Amad Diallo chu Rangers-ah inchher hriam turin an chhuahtir a, player dang Teden Mengi (Birmingham), Axel Tuanzebe (Napoli), Ethan Laird (Bournemouth), Reece Devine (Watsall) leh Matej Kovar (Burton Albion) te chu loan hmangin an chhuah.
Man United-in thlasik bazarah player an lalut miah lo a, tlarhma lama hmun pawimawh chang pha Mason Greenwood chu hmeichhe laka mawi lo taka chet avangin training leh match khelh an phalsak lo.
Greenwood hian pawngsual leh kut thlak thubuai a nei a, a chet dan mawi lo tak hian nghawng a nei lian hle. Nike-in Man United forward nena contract an neih lai chu an titawp lailawk a, games siamtu lar Electronic Arts (EA) pawhin FIFA 22 aṭangin an paih bawk.
Pogba inlan hun
Paul Pogba chu nikum November thlaa a inhliam avangin tun thlengin a la inlan lo a, manager lailawk Rangnick hnuaiah a la khel lo. Chutihrualin French midfielder hian training a zawm tawh a, German manager mit a tlung.
Rangnick chuan, "Pogba hian fan hmaah a theihna pholan a duh. Hmun danga contract ṭha a hmuh theih nana theihtawp chhuah pawh ni se, ka luhtir lohna chhan ka hre lo. Keipawh nipuiah ka contract a tawp dawn alawm," tiin kumin January thla khan French midfielder Pogba a chhawr tur thu a sawi tawh.
Kum 28 mi Pogba hi Middlesbrough nen hian dam hman tawh tura ngaih a ni a, French midfielder bakah hian Luke Shaw, Victor Lindelof leh Jadon Sancho te pawh an khelh theih a beiseiawm.
Engtin zel?
World Cup qualifier khel tura zin chhuak Alex Telles, Fred (Brazil ve ve) leh Edinson Cavani (Uruguay) te chu an zin chauh avangin bul lo ṭan lo thei dinhmunah an ding hlawm. Chutihrualin Cavani hian Venezuela 4-1 a an hneh ṭumin mawi zetin a khung a, Uruguayan forward hi mamawh hunah chuan a chhawr thei ang.
Europe tan erawh tun ṭum international break hi hahchawlhna hun ṭha a ni a; Cristiano Ronaldo, Bruno Fernandes, Harry Maguire leh Raphael Varane te inkhel turin an inpeih ang. Hriat tel tur erawh February 8, Thawhlehni zan hian Man United-in Burnley an tlawh dawn a, Rangnick-a'n FA Cup bakah Premier League inkhel tur hi a chhut tel a ṭul dawn a ni.
Boro ve thung
Middlesbrough hi Cham-pionship club an ni a, league-ah pasarihnaah an awm phak avangin Premier League club chhiar tel loh chuan club ṭha zinga mi an ni.
International break laiin Championship khelh a ni a, Boro hian kartawp khan Coventry 1-0 in an hneh. Amaherawhchu an player thar Riley McGree chu an ram Australia tana a fehchhuahna lamah a positve avangin a la khel thei dawn lo.
Chutihrualin Arsenal aṭanga loan hmanga an hawh striker Folarin Balogun erawh hmun pawimawh a chang thei ang. Coventry an hneh ṭumin Balogun hi bench aṭanga lutin Andraz Sporar a goal khung tur a siamsak.
FA Cup - Fourth Round
Zanin Inkhel Tur
Manchester United 1:30 AM Middlesbrough
February 5, Inrinni
Chelsea 6:00 PM Plymouth Argyle
Kidderminster Harriers 6:00 PM West Ham United
Crystal Palace 8:30 PM Hartlepool United
Huddersfield Town 8:30 PM Barnsley
Peterborough United 8:30 PM Queens Park Rangers
Southampton 8:30 PM Coventry City
Everton 8:30 PM Brentford
Stoke City 8:30 PM Wigan Athletic
Manchester City 8:30 PM Fulham
Wolverhampton Wanderers 8:30 PM Norwich City
Cambridge United 11:00 PM Luton Town
Tottenham Hotspur 1:30 AM Brighton & Hove Albion
February 6, Pathianni
Liverpool 5:30 PM Cardiff City
Nottingham Forest 9:30 PM Leicester City
AFC Bournemouth 12:00 AM Boreham Wood