Inhnek ropui a ni dawn - Jake Paul

Social media lama hriat hlawh, boxing huanga hming chher bawk Jake Paul chuan Katie Taylor leh Amanda Serrano te inhnek tur a thlirlawk a, boxing khawvela inhnek hriat hlawh leh ropui a nih ngei a rin thu a sawi.

Lightweight champion Taylor hian a kawnghren kawl lai hi weight pasariha champion thei Serrano lakah humhim a tum dawn. Hmeichhe boxer ṭha pahnih hi April 30 hian New York khawpuiah an intawng dawn.

Paul chuan, "An tana boxing dawhsan buatsaih a ni hi a lawmawm, an phu hle bawk. Tunge miten an ngaihhlut a, sum tam tak senga an en châk tih chu a hriat bawk ang. Hun rei tak chhung hmeichhe boxing hian ngaihven a hlawh tawk lo a ni mai thei, tuna mi chu a danglam ang," a ti.

Irish fighter Taylor hian 2019 June thla khan Delfine Persoon hnehin a kawnghren hi a hlawh chhuak a, a kawnghren kawlte chuhpuitu vawi nga a hneh tawh - tun ṭum hi a vawi rukna tur a ni ang.

Tun ṭuma an inhnek tur hi a tira ruahman dan chuan 2020 May thla khan Manchester khawpuia neih tur a ni, mahse hripui vangin an ṭhulh. Kum hnih deuh thaw an nghah hnuah an ti hlawhtling thei dawn ta niin a lang.

Serrano hi Paul nena thawkdun an ni a, social media lama hriat hlawh Paul hi Youtuber ni mah se boxing a luh hnuah vawi nga inhnek tawkin a la chak vek a, boruak an nei chho deuh hluai a nih pawhin a mak lo ang.