Gerard tel lohna Old Firm derby: Rangers an mualpho
November thlaa Steven Gerrard-a'n a chhuahsan hnua a vawi khat nan Rangers-in Old Firm derby an hmachhawn a, an hmelma kumhlun Celtic lakah 3-0 in an mualpho!
Celtic Park-a fans 60,000 pungkhawm hmaah Celtic-in inkhel an thunun a, Japanese mifielder Reo Hatate chuan goal hnih khungin Liel Abada chuan goal khat a khung bawk - Rangers-in a chhanletna tur an nei lo.
Rangers an tlawm avangin Celtic-in league table chung ber an luah zui nghal a, Gerarrd-a'n table-a pakhatna ni chunga a chhuahsan team hian point khatin Celtic an phak ta lo.
November 7 khan Rangers hian Gerrard-a hnuaia an match hnuhnung ber an khel a, league-ah 4-2 in Ross County an hneh - khatihlai khan Celtic aiin point liin an sang a, tunah erawh an chung en ta.
Old Firm derby
Khawvela inkhel boruak 'hot' ber pawl thlang dawn ila Old Firm derby hi lam hmasak zingah a tel ngei ang - Celtic leh Rangers inhuatna hi khelmual aṭanga inṭan a ni lo, sakhuana, politics leh hnam thil a inrawlh vek avangin an inhuat dan hi a ril hle.
Protestant ten an ṭan zawk chu Rangers a ni a, Catholic lamin Celtic an ṭan thung. Rangers-in ziak loh dan an neih langsar tak pakhat chu, "Hre reng chungin Catholic mi leh sa player lakluh loh tur," tih a ni!
Hei hi chu an inhuatna pakhat chauh a ni - politics leh hnam thil thlenga inhuatna intuh a nih avangin Old Firm derby-a tlawm hi team pahnihin an duh ngai lo a, Celtic laka 3-0 a tlawm hi Rangers fans tan chuan a na ang.
Rangers fan-ten, "Steven Gerrard chu Anfield-ah legend a ni a, Glasgow-ah chuan pathian a ni," tin inziak banner an keng ṭhin a, hetiang taka Gerrard an ngaihsan chhan hi league nomawi a chawipui vang a ni satliah lo - Celtic lalṭhutthleng nam thlu a, ropuina rama Rangers a din tir lai chu an ngaihhlut chu a ni.
Gerrard 9 - 3 Celtic
Gerrard-a hnuaiah Rangers-in match 193 khelin vawi 125 an chak thei a, vawi 42 draw result an nei - vawi 26 chiah an tlawm a, vawi 406 goal an khung laiin an lamah goal 135 chiah a lut bawk.
Kum 2018 khan Gerrard-a'n team tluchhe mek Rangers chu tundin theih inbeiseiin a pan a, Old Firm derby thawnthu a thlak danglam nghal bawk - an intawn hmasa zawkah ngam lo mah se a vawi hnihnaah erawh a hneh a, Brendan Rodgers-a'n Old Firm derby-a match 12 tlawm lo result a neih tawh chu a tihtawpsak.
2018-19 season-ah hian vawi li an intawng a, vawi hnih ve ve an chak. 2019-20 season-ah vawi thum an intawng a, vawi hnih Rangers an chak a, vawi khat an tlawm. Season hmasaa vawi nga an intawnah phei chuan Rangers-in vawi li hnehna an chang a, vawi khat an inhnehtawk.
Scottish Premiership-a an intawn hnuhnung berah phei chuan 4-1 ngawtin Rangers an chak. Tun season-ah vawi hnih chiah an la intawng - an intawn hmasak zawkah Gerrard-a'n Rangers a la enkawl a, a chakpui. Gerrard awm loh hnua Old Firm derby an hmachhawn hmasak berah 3-0 in Rangers an tlawm nghal!
Ngaihlai Gerrard
Rangers manager Giovanni van Bronckhorst chuan, "Old Firm derby kan vawi khat khelhna emaw tih mai turin kan khel a, tih tur leh tih loh tur hre saa inkhel kan ni a, Celtic hmachhawn tura la inpeih lo ang maiin kan khel lawi si," a ti.
Van Bronckhorst-a'n a naute a sel na viau a, a hriat tel tur erawh tuna Celtic laka mualpho tho hi Gerrard-a'n Celtic laka hnehna a chanpuite kha an ni. December 2019 League Cup final hnua a vawi khat nan Old Firm-ah Rangers an tlawm tlat.
Dutch coach Van Bronckhorst tan Rangers boss a nih hnua a tlawm hmasa ber ni mah se an tlawm dan erawh a mualpho thlak a, Old Firm derby-a an match hmaa an league match hnuhnung pathumah vawi khat chiah an chak bawk - vawi hnih draw result an nei.
Rangers hian kum 1986 hnua a vawi khat nan league match hnihah a zawnin goal ruk an chhuahna a ni bawk - Gerrard hoa an champion khan season tluanin goal 13 chiah an chhuah! Rangers fan-ten Gerrard hming an lam ri leh ṭhin ang a, chumi tireh tur chuan Van Bronckhorst tan thawhrim a ngai khawp ang.