Davis hoin Lakers an chak

Tun hnaia che fuh hleithei lo Los Angeles Lakers chuan chak ni hmel an hmu ve leh ta. Nimin zing khan Lakers hian inkhel inhnehtawk takah Portland Trail Blazers chu 99-94 in an hneh a, an chak theihna chhan chu Anthony Davis a ni.

Lakers thiampuipa Davis hian point 30 a neih bakah rebound vawi 15 zet a la bawk a, player ṭha LeBron James chu khup na vangin inlan thei lo mah se Davis a awm miau avangin an dinhmun a ṭha zawk.

Los Angeles khawpuia inkhelah Trail Blazers tan Norman Powell (30 points) leh Anfernee Simons (19) te pawh an che chhe lo, mahse an player pawimawh guard Damian Lillard awm loh an tuar a, hun pawimawhah basket neih an harsat bakah an in veng hleithei lo.

Western Conference table-ah Lakers hi pakuana an ni mek, playoff khel tur chuan pariatna chin nih phak a ngai. LeBron James leh Davis te awmna team hian thlen san an duh a nih chuan ho lam taka chet sual fo a remchang tawh lo ang.

Nimin zing inkhel dangah Washington Wizards tan Spencer Dinwiddie chuan triple-double (14 points, 12 rebounds & 10 assists) a nei a, a team hi Philadelphia 76ers lakah 106-103 in hnehna a chanpui.

Team ṭha zinga mi ni mah se che fuh hleithei lo chu Brooklyn Nets an ni. Nets hi Sacramento Kings lakah 112-101 in an chak lo, tun hnai an match hnuhnung paruk zetah an tlawm ta; insiamṭhat an mamawh takzet.

NBA - Nimin Results
Orlando Magic 119 - 118 Indiana Pacers
Cleveland Cavaliers 104 - 115 Houston Rockets
Portland Trail Blazers 94 - 99 Los Angeles Lakers
Washington Wizards 106 - 103 Philadelphia 76ers
Oklahoma City Thunder 120 - 114 Dallas Mavericks
Charlotte Hornets 107 - 113 Boston Celtics
Denver Nuggets 104 - 108 Utah Jazz
Memphis Grizzlies 120 - 108 New York Knicks
Brooklyn Nets 101 - 112 Sacramento Kings