Khawvawt hnuaiah US an chak

World Cup khel tur zawnnaah United States chuan nimin zing khan Honduras 3-0 in an hneh. Allianz Field, Minnesota-a inkhelah hian Weston McKennie (8'), Walker Zimmerman (37') leh Christian Pulisic (67') ten goal an khung.

US leh Honduras inkhela khawvawh zawng hi -16C a ni a, a vawh em avangin player pahnih chu thlak an ngai hial. Mikhual team coach Hernan Gomez chuan halftime-ah player pathum a thlak a, pahnih hi khawvawh vang a ni.

Khua a vawh em avang hian player-te pawh an inthuam lum a, hmai tuam thlengin an phalsak. US hian match 11 aṭangin point 21 an hmu a, Mexico nen an point hmuh zat inangin pahnihna leh pathumnaah an awm.

Mexico hian Wolves forward Raul Jimenez goal hmangin Panama 1-0 in an hneh. Hmahruaitu Canada-in Atiba Hutchinson leh Jonathan David te goal hmangin El Savador 2-0 in an hneh a, World Cup khel turin an dinhmun a ṭha tawh hle.