AFCON: Mane-a'n final-ah Senegal a hruai thleng

A hming chu Sadio Mane a ni a, Senegal tan chhandamtu a ni - Liverpool forward hian Africa Cup of Nations semifinal-ah Senegal tan goal khat a khung bakah assist vawi khat a nei a, Burkina Faso lakah a team chu 3-1 in hnehna a chanpui.

Senegal tan Abdou Diallo leh Idrissa Gueye ten minute 70 hnu lamah goal khat ve ve an khung a, Burkina tan Blati Toure chuan a rawn sut ṭhen ve leh avangin Senegal an hlauthawng hman.

Mahse, Gueye goal khung tur siamsaktu Mane-a'n minute 87-naah an goal thumna a khung a, 3-1 in inkhel a tawp a, kum 2019 final-a chak zo lo Senegal-in AFCON final a zawnin an khel dawn.

Nizan khan inelna thlengtu Came-roon leh Egypt ten semifinal pakhat zawk an khel bawk a, he thu ziak i chhiar meuh chuan Senegal nena final khel tur a chiang tawh ang - Senegal hi Africa aṭangin FIFA ranking a sang ber (20-na) ni mek mah se AFCON-ah an la champion ngai lo.

A 'hot'
Inkhel ṭan aṭanga minute lina lekah Senegal midfielder Nampalys Mendy leh Burkina winger Cyrille Bayala te ball inchuhin na takin an intauh nghal a, player pahnih an inhliam lo ve ve a, an vannei - final luh inchuh boruak a hot nghal.

Chawlhlawk a nih hmain Senegal-in vawi hnih ngawt penalty an hlawh chhuak emaw an ti a, mahse, referee Bamlak Tessema Weyesa-a'n video assistant referee a rawn hnuah a thutlukna a sut ve ve.

Burkina Faso goalkeeper Herve Koffi chu Senegal midfielder Cheikhou Kouyate nen ball an inchuhna lamah a foul niin referee-in a hmu a, mahse, VAR hmanga a ennawn hnuah a sut - Koffi hi hliam vangin lakchhuah a ngai zui.

Edmond Tapsoba chuan Senegal tana Idrissa Gueye goal khung tur chu a kiuin a dang bawk a, referee-in a tirah penalty spot kawk mah se mual sira monitor hmanga a ennawn hnuah a sut - Burkina tan Aston Villa forward Bertrand Traore a hlauhawm ve reng bawk a, goal lut loin chawlhlawk hman a ni.

Danglamna Mane
Team pahnihin first half-ah goal khung an harsat ve ve a, second half-ah goal li kan hmu thung! Senegal tan minute 70-naah Paris Saint-Germain centre back Diallo chuan Kalidou Koulibaly siamsak chu goal-ah a chantir a, 1-0 a ni.

Minute ruk a liam hman lo, Mane chu amah vengtu Issoufou Dayo lak aṭanga tal putin ṭha takin ball a lalut a, Gueye tan a siamsak - PSG defensive midfielder tan goal-a chantir loh chu thil zahthlak a ni tawh a, a goal chiang hle.

Sipaiin tharum hmanga an ram rorelna an lak mek chanchin karah Burkina an beidawng duh lo - Blati Toure chuan minute 82-naah si phurh a rawn sut ṭhen a, si phurh sut zo turin minute riat dang an la nei.

Mahse, Burkina ni loin Senegal bawkin an khung nawn a, hun tawp nan minute thum chiah a awm tawh tihah counter attack hmangin Senegal-in Burkina an nawr let a, Mane-a'n chak nemnghehna goal a khung.

Record thar
Mane-a'n goal a khung a, ram tana goal 29 a khunga chiah a ni - Senegal tana goal khung hnem lamah Henri Camara a nih rual ta chiah bawk. Kum 29 mi lek a la ni a, thilmak a thleng a nih loh chuan record thar a siam ngei dawn.

Liverpool forward hian ram tana goal 29 khung tur hian match 86 a mamawh a, record a nih rual Camara hian match 99 a mamawh thung. Camara hi Premier League-a Wolverhampton Wanderers, Southampton, Wigan Athletic, West Ham leh Stoke City tan pawha lo khel tawh kha a ni.

Mane chuan, "A zawna AFCON final luh hi a awlsam dawn lo tih kan hre sa a, tunah chuan final-ah tu pawh hmachhawn dawn ila, champion ngei tura kan inbuatsaih a ṭul ta a ni.

"Team ṭha tak Burkina kan hmachhawn avangin harsatna pawh kan tawk a, kan beisei ang ngeiin game harsa khel mah ila chance kan insiam hnem em em a, chak kan phu zawkin ka hria," a ti a, record aiin an team result-in a rilru a luah zawk.

Semifinal
February 2, Nilaini Zan
Burkina Faso 1 - 3 Senegal
BUR: Blati Toure 82'
SEN: Abdou Diallo 70'; Idrissa Gueye 76'; Sadio Mane 87'

February 3, Ningani Zan (Result kan hre hman lo)
Cameroon 12:30 AM Egypt