Federer hma hun la chiang lo

Hliam vanga chawl mek Roger Federer chuan a hma hun a la sawi lawk mai theih loh thu a sawi. April emaw May thla velah emaw chuan a awm zel dan tur chu hriat theih a beisei thu a sawi bawk.

Grand Slam vawi 20 champion tawh Federer hi kum 40 mi a ni tawh a, dam pawh ni se tournament zawng zawng khel thei tur a ni tawh lo. Nikum Wimbledon quarterfinal-ah khan Hubert Hurkacz a hneh lo, a hnu lamah a la inkhel leh miah lo a ni.

A kum a tam tawh bakah hliamin a tlak buak fo a, tuna a chawlh chhan pawh a khup hliam an zai chu a la dam fel loh vang a ni. Tennis chawlhsan la tum lo mah se ngai a awh theih miau loh chuan ngaihtuahna sen ṭhat leh a ngai dawn.

Swiss star Federer chuan, "Ṭha taka inkhelh leh theih chu ka duhthusam ber a ni, chutih rualin tunah tak chuan engtikah nge ka lo kir ang tih pawh sawi theih a ni lo. April-May velah chuan sawi theih turah ngai ang.

"Gym-ah taksa ka sawizawi reng a, ka taksa in a tlin tawk chuan ka bei reng," a ti. A inkhelh loh rei tak em avangin world number 1 hlui hi tunah chuan number 30 a ni daih tawh, tournament a khelh hunah a kawng a awlsam dawn lo.

Beisei a la neih thu sawi zuiin Roger chuan, "Rafael Nadal nen kan inbiakna a la rei lo, hmanni lawkah khan hliam vanga ngai a la awh loh thu leh, inkhelh theih a châk thu min hrilh. Tunah chuan Australian Open champion a ni leh der tawh, entawn tur ṭha tak a ni," a ti.

Federer-a'n Grand Slam a lak hnuhnung ber chu Australian Open 2018 kha a ni a, a hnu lamah hlawhtlinna lian a la chang leh lo. Tennis huang chhuangah a lo kir leh thei a nih pawhin nomawi chawi tur chuan vanneihna a mamawh tel tawh ang.