A hniam lam inbeihna a nasa dawn - Roy Hodgson

Premier League table hniam ber dawta awm Watford manager thar Roy Hodgson chuan a hna thar a hautak dawn tih a sawi a, inhamtan tuma inbeihna chu thil awlsam ni dawn lo mah se chona hmachhawn a chak thu a sawi.

Kum 74 mi Hodgson hian Claudio Ranieri a thlak dawn, tun season tawp thleng Watford hi a enkawl ang. Italian manager Ranieri hian match 14 chauh team a kaihruai hman a, beisei ang result an neih loh avangin an ban.

Watford dinhmun a ṭha lo, chutih rualin a him china awm Norwich City an phak lohna chu point hnih chauh a ni thung. Khelh hmabak match 18 ngawt an la neih avangin an dinhmun hi nasa taka siamṭhat theih tur a la ni.

England manager hlui hian Nilaini zan khan thuthar thehdarhtute a khawm, zawhna a dawn hmasak zinga mi chu, Watford hi Premier League-ah i inhamtan pui thei ang em? tih a ni. Hodgson chuan, "Thil theih chiang tak a ni, ngei ngei dawn tih chuan ka sawi duh lo.

"Mahse, Watford hi Premier League khel zel turin kan awm theih ka ring. Chutih rualin EPL hi chu engtik lai mahin a awlsam ngai lo, a bik takin tun season chu inhamtan tuma inbeihna hi a nasa dawn hle," tiin a sawi.

Ranieri-a'n a enkawl lai khan Watford hian match hnuhnung 13 aṭangin point sarih chiah an hmu, an elpui Norwich lakah 3-0 ngawta an tlawm avangin insiamṭhat ngaihna lai an ngah hle tih a chiang.

Hodgson-a'n a enkawl china an match hmasa ber atan Inrinni hian Burnley an hmachhawn dawn. Burnley hi season kal laia vawi khat chiah chak la nei an ni, chutih rualin an match hnuhnung lama Arsenal nena inhnehtawk an nih avangin zuam sual theih tur an ni.

English manager Hodgson chuan, "He hna thawk tura min sawm khan an thil duh leh ka mawhphurhna tur chu chiang takin ka hre nghal, chuvangin chona hi ka tan chuan pawm a harsa lo. Kan elpui turte tumah kan sawi nep lo, chutih rualin kan squad neih ang hmang turin kan inpeih," a ti.