Chelsea lakah Liverpool-in point hlawh chhuak

Stamford Bridge-ah kut ruakin Liverpool an haw dawn niin a lang hman a, a tawpa result erawh 1-1 a ni.

Chelsea tan striker hlui Daniel Sturridge chu hmelma a chang a, English striker hian Eden Hazard hmahruaina goal chu minute 89-naah a sut.

Liverpool-in Premier League hmahruaitu an nihna erawh an hloh a, a chung berah Manchester City an awm. Pep Guardiola naute hian Brighton & Hove Albion chu 2-0 in an hneh a, goal difference-ah Liverpool aia an ṭhat zawk avangin hmahruaitu an ni.

Arsenal pawhin season bul an ṭan fuh lo chungin inelna hrang hrangah a zawna vawi sarih an chakna ni turin hnehna an chang a, an mikhual Watford chu 2-0 in an hneh. Tottenham Hotspur chuan 2-0 in Huddersfield an hneh bawk.

Chhandamtu Sturridge
Liverpool-in first half aṭangin goal khung tumin an nawr nghal a, mualneitu Chelsea an buai zawk. Mahse, minute 25-naah Blues an vannei hmasa a, mawi zeta ball an inpek kual hnuah Mateo Kovacic siamsak ṭha zet chu Hazard-a'n goal-ah a chantir.

Reds tan Sadio Mane leh Mohamed Salah ten goal khungna remchang nei ṭhin mah se an chhawr thei lo - Salah hian vawi thum vel chu chance duhawm a nei a, khel ṭha mah se season hmasa angin inrintawkna a nei lo niin a lang a, goal hmaah a hriam tawk lo.

Jurgen Klopp-a'n thutlukna huaisen thlak tak siamin minute 66-naah Salah a la chhuak a, Xherdan Shaqiri a luhtir. Mahse, Swiss forward hian goalkeeper chauh hmachhawn chungin a hun ṭha neih a chhawr bik lo.

Hun tawp nan minute nga chiah a awm tawh tihah Sturridge luhtir a ni a, Klopp-a indawm kun nawn tawh lo - English striker hian Luis Suarez nena inkawp ṭhin striker class sang tak kha a la ni reng tih a pholang a, yard 25 vela hla aṭangin mawi zetin si phurh sutna a khung.

Lawm ve ve
Liverpool hian League Cup-ah Chelsea an ngam lo tawh a, inkhelh hmain Klopp chuan Stamford Bridge-ah hnehna chan ngei an tum thu sawi mah se a tawpah si phurh sutin an vannei hram.

Klopp erawh a lawm tho a, "Chelsea-a point hlawhchhuah hi chu engtiklai pawhin a ṭha a, khatianga kan khelh zel chuan hnehna kan chang fo ang," a ti.

Blues manager Maurizio Sarri pawhin vuina tur a nei lo. Italian manager chuan, "Team ṭha tak kan tum a, kan khel ṭha hle. Draw kha result fair takah ka ngai," a ti.

Liverpool hian Nilaini zanah Champions League khel turin Napoli an lenchilh zui ang a, Chelsea-in Ningani zanah Europa League an khel thung ang.

City tan a awlsam
City-in Brighton laka hnehna chang turin harsatna an tawk lo. Raheem Sterling leh Sergio Aguero ten goal khat ve ve an khung a, Brighton lakah 2-0 in an chak.

Brighton keeper Mat Ryan chuan minute 90 chhung hna a nei - shot vawi 28 ngawt a hmachhawn laiin Brighton erawhin vawi li chiah shot an nei thung.

Pep chuan, "Result ṭha tak a ni," a ti a, hmahruaitu an nihna a rei dawn leh dawn loh erawh a chiang thuai ang - Pathianni zanah Liverpool an lenchilh dawn.

Tottenham chuan an mikhualna ramah Huddersfield chu 2-0 in an hneh ve bawk.

Spurs tan tun hnaia sawisel hlawh Harry Kane-a'n amah sawiseltute a chhanglet a, goal hnih hi a khung a ni.

Laipui a puak
Arsenal-in league match nga chhung a zawnin hnehna an chang ta - Watford chu 2-0 in an hneh a, goal khung tur erawhin minute 80 piahlam an nghah thlen a ngai thung.

Watford defender Craig Cathcart chuan minute 81-naah an lamah a ti lut a, minute hnih liam hnuah Mesut Ozil chuan an goal hnihna a khung ve leh bawk.

Gunners tan chanchin lawmawm lo erawh a awm a, goalkeeper Petr Cech chu malpui hliam vangin first half-ah lakchhuah a ngai a, pound maktaduai 19 man Bernd Leno chuan a vawi khat nan Premier League a khelh phah.

Arsenal manager Unai Emery chuan Cech chu kar hnih aṭanga kar thum inkar a chawlh a ngaih tur thu a sawi a, Leno tan a pu 'hminna' hun ṭha a ni thung.

Inkhel Result
West Ham 3 - 1 Manchester United
Arsenal 2 - 0 Watford
Everton 3 - 0 Fulham
Huddersfield 0 - 2 Tottenham
Manchester City 2 - 0 Brighton
Newcastle United 0 - 2 Leicester City
Wolverhampton 2 - 0 Southampton
Chelsea 1 - 1 Liverpool