Blasters an chak nghal

India rama football inelna ngaihhlut hlawh ber Indian Super League chu Inrinni zan khan khelh ṭan a ni a, Kerala Blasters chuan ATK lakah 2-0 a hnehna changin point thum nen bul an ṭan.

South Indian club tan a vawi khat nana ISL-a inlan Slovenian striker Matej Poplatnik chuan minute 77-naah goal hmahruai a khung a, hun tawp nan minute li chiah a awm tawh tihah Serbian forward Slavisla Stojanovic chuan goal khat a rawn khung ve leh bawk.

ATK tan an si phurh chhanglet turin hunin a daih tawh lo a, an club chanchina a vawi khat nan an league match hmasa berah an tlawm nghal.

Kerala Blasters tan Lalruatthara chuan inkhel bul ṭanin minute 90 chhung a khel tluan a, ATK lamah Sena Ralte chuan a khel tluan bawk.

Blasters-in Ruatthara tih loh Mizo kawl an nei lo a, ATK hian Ricky Lallawmawma chu bench-ah dahin Malsawmzuala leh H. Lalmuankima te tan squad-ah hmun a awm rih lo thung.