Entu nei loin Formula 1 an tlan A khuh hawn nan Bottas a chak

Car intlansiakna sang ber Formula 1 chu Pathianni zan khan tlan ṭan a ni ta. Intlansiak sawi hlawh leh mipui ngaihven takah Mercedes driver Valtteri Bottas chuan hnehna a chang - champion lai Lewis Hamilton chuan hremna tawkin palinaah a thleng.

F1 season hi March thla a ṭan tur kha ni mah se Covid-19 vangin a hunah an ṭan thei lo. Thuneitu lam chuan intlansiak hmasa chu Europe khawmualpuia neih turin an ruahman; July 12 hian Styrian Grand Prix an tlan leh dawn.

Coronavirus vangin a hmunah entu fans an awm thei lo a ni mai lo a, inelna kalphung pawh tih danglam a ngai. Driver leh team lam lawm avanga inkuah leh inchibai a rem lo a, intlansiak zawhah dawhsan (podium) hran buatsaih a ni lo. Tlankawngah lawmman semna lai tur bik an siam chawp a ni.

American mihang pakhat thihna in khawvel a nghawng a, infiamna huangah pawh chi inthliarna an do zia an lantir deuh zel. Mercedes phei chuan hun rei tak chhung car silver rawng an hman tawh chu kumin atan a dumin an thlak hial a ni.

Mercedes driver Hamilton hoin intlansiak ṭan hmain chi inthliarna do nan tlankawngah driver an ṭhingṭhi. Driver-te hian 'End Racism' tih inziahna T-shirt an ha bawk. Driver paruk erawh an ṭhingṭhi ve lo, 

ṭhingṭhi lo zingah Charles Leclerc leh Max Verstappen te pawh an tel. Ferrari leh Red Bull driver-te hian inelna an neih hma khan chi inthliarna chu do tho mah se an ṭhingṭhit loh tur thu hi an sawi lawk. Urhsun taka khuh hawnna an neih hnu hian Red Bull Ring-ah intlansiak an ṭan, season ṭan hun tura an ruahman aiin thla li zetin an tlai.

Season hmasa ang bawkin qualifying aṭangin Mercedes an che ṭha a, champion lai Hamilton aiin Bottas-a'n 0.012-a hun a hman tlem zawk avangin a hmasa ber (pole position) aṭangin intlansiak bul a ṭan; a hnung chiahah Verstappen a awm thung.

Dutch tlangval Verstappen hian 2018 leh 2019 khan Austrian Grand Pirx-ah hian hnehna a chang a, kuminah pahnihna aṭangin tlan ṭan mah se chak tura rinkai a ni. Mahse, pahnihna dinhmun a luah mek laiin khawl lam chiang lo vangin a tlan chhunzawm thei ta lo; lap 71 tlan tur zinga 14 chauh a tlan hman. Tlankawng chhungah Hamilton a hmuhnawm a, safety car rawn luh ngai chuan a duh thala a tlan tur a ti ṭhuanawp zawk. Amaherawhchu champion lai hi Red Bull driver Alex Albon nen an intihpalh vangin 'five-second time penalty' a hmu. Pahnihnaah thleng mah se hremna pek a nih vangin palina dinhmun a luah.

Ferrari driver Leclerc chu pasarihna aṭangin tlan ṭan mah se pahnihna a ni a, a teammate Sebastian Vettel erawh a sang zual 10 zingah a tel phak hram. Hamilton an hrem tak avang hian McLaren driver Lando Norris chu a vawi khat nan podium lawn phak chin, pathumna a ni bawk.

Hnehna changtu Valtteri Bottas chuan, "Chesual emaw hun tlemte paih zauh ni ila chuan Lewis khan min tlanpel nghal dawn tih ka hre sa a, a tawp thleng khan fimkhur thei ang berin ka tlan. A hmasa ber aṭanga bul ṭan ni mah ila min nawr reng a, a awlsam lo hle. Intlansiak ka thunun theih avang erawh chuan ka lawm," a ti.

Ferrari driver Charles Leclerc chuan, "Intihpalh leh inbakkaih ṭhenkhat kha chu intlansiakin a ken tel ve a ni. A tuartu zinga Lewis a tel kha ka vanneih phah thung. Season bul ṭanna ṭha tak a ni a, hmasawnna lai tur la awm chu harsa lo taka siamṭhat theih a ni ang," tiin a sawi. Season ṭan hmain Ferrari leh Vettel inkar ṭha lo a puak keh a, team principal Mattia Binotto chuan, "Vettel, tlankawng leh car kha a inkawprem tawk lo, nidangah pawh Austria-ah hi chuan kan ṭha tawk lo ṭhin a, intlansiak lehpekah chuan hma kan sawn ang," a ti.

2020 F1 Austrian Grand Prix - Race Results

    #    Driver    Ram    Team    Time

    1    Valtteri Bottas    FIN    Mercedes    71 Laps

    2    Charles Leclerc    MON    Ferrari    +2.700

    3    Lando Norris    GBR    McLaren    +5.491

    4    Lewis Hamilton    GBR    Mercedes    +5.689

    5    Carlos Sainz    ESP    McLaren    +8.903

    6    Sergio Perez    MEX    Racing Point    +15.092

    7    Pierre Gasly    FRA    AlphaTauri    +16.682

    8    Esteban Ocon    FRA    Renault    +17.456

    9    Antonio Giovinazzi    ITA    Alfa Romeo    +21.146

    10    Sebastian Vettel    GER    Ferrari    +24.545

    #    Hun    Inelna    Hmun

    1    July 12    Styrian Grand Prix    Spielberg

    2    July 19    Hungarian Grand Prix    Budapest

    3    August 2    British Grand Prix    Silverstone

    4    August 9    70th Anniversary Grand Prix    Silverstone

    5    August 16    Spanish Grand Prix    Barcelona

    6    August 30    Belgian Grand Prix    Spa-Francorchamps

    7    September 6    Italian Grand Prix    Monza