Ramhlun North an la insiamṭha thei lo

Mc Dowell's No. 1 Soda Mizoram Premier League Season 7-ah Ramhlun North an talbuai chhunzawm zel a, Zirtawpni zana an foreigner thar pahnih midfielder John Ampong leh Bamba Musah hmang chungin Aizawl FC 2-0 in an hneh lo.

I League club Aizawl FC-in match ngaah point riat hmuin pathumna dinhmun an luah a, Ramhlun North erawh goal difference vangin table mawngphahah an awm a ṭul thung.

Coach thar?

Ramhlun North head coach F. Lalrozara chuan result ṭha a neih loh avangin club hnenah a nihna aṭangin chawlh a dil a, club thuneitu lamin an ngenna hi an zah sak. Chutihrualin Rozara hi coaching staff-ah a la tel chhunzawm dawn a, tualchhung transfer hun a inhawn leh chiah avangin scout hna a chelh chhunzawm ang.

Club secretary K. Lalenghluna (Maenga) chuan, "Kan club head coach thar tur chu kan zawng ngei a, thutlukna erawh kan la siam thei lo," tiin Vanglaini a hrilh.

MPL7 round 5 khelh zawhah Ramhlun North-in point khat chiah an la hmu a, hei hi season liam taa Mizoram Police dinhmun chiah a ni.

MPL6-ah hian Police-in coach atan Lalbiaksanga Colney an lalut a, round 14 khelh zawhah point 20 an hlawh chhuak a, pathumna hial an nih phak avangin sum hmang tam Ramhlun North tan champion kawng a la inkhar lo.

AFC an ṭha?

Aizawl FC-in minute 10 lekah Remsanga hmangin hma an hruai a, team thawhrah aiin Lengpui tlangval thiamna a langzar zawk. An goal hnihna erawh team thawhrah a ni a, Joe Zoherliana vawrhluh chu Remsanga'n pumbilh loin Rochharzela a pe leh a, Chhinga Veng rawlthar hian awlsam takin a khung.

I League club tan chak turin harsatna an tawk lo a, amaherawhchu an budget mil chuan an khel ṭha tawk lo niin a lang. Gift Raikhan hote hian stage sang zawkah chuan foreigner an neih belh dawn a, tuna an squad ṭha sa nen pathumnaa lawm tur an ni lo.