Asia Cup champion India

India cricket team chuan Asia Cup champion ni turin Zirtawpni zan khan Bangladesh chu wicket thumin an hneh a, a vawi sarih nan an champion.

Dubai-a final hmuh-nawm takah hian ṭhum vawrah India an chak a, vawm hmasak an thlang. Bangladesh tan opener Liton Das chuan run 121 zet siam mah se thlawptu ṭha a neih loh avangin over 48.3-ah run 222 siamin an thi vek a, Indian bowler Kuldeep Yadav (3-45) leh Kedar Jadhav (3-41) ten wicket thum ve ve an la bawk.

India bat hun a thleng a, captain hna chelhtu Rohit Sharma chuan run 48 siamin Dinesh Karthik (37) leh MS Dhoni (36) te pawh khel chhe lo mah se run siam ṭha fal an awm loh avangin dinhmun derthawng takah an ding.

All rounder Jadhav chu batting lamah pawh a che ṭha a, amaherawhchu over 38.1-ah a ke dinglam na vangin a chhuak a, wicket sarih a tlak chiahin a rawn lut leh. Jadhav-a rawn luh nawn chiah hian India-in ball 11-ah run siam an la mamawh a, ball khat a la awmin 222 ve ve an siam a, hetah hian Mahmudullah ball vawm chuan Jadhav-a pad fuhin India chu run khatin an chak hram.

Tun inelnaa run siam tam ber India batsman Shikhar Dhawan (342 runs) chu player of the series-ah thlan a ni.

Kum Champion Runner-up
1984 India Sri Lanka
1986 Sri Lanka Pakistan
1988 India Sri Lanka
1990/91 India Sri Lanka
1995 India Sri Lanka
1997 Sri Lanka India
2000 Pakistan Sri Lanka
2004 Sri Lanka India
2008 Sri Lanka India
2010 India Sri Lanka
2012 Pakistan Bangladesh
2014 Sri Lanka Pakistan
2016 India Bangladesh
2018 India Bangladesh