Wuhan Open champion Sabalenka

Aryna Sabalenka chuan Anett Kontaveit hnehin Wuhan Open nomawi a chawi. Inrinni zana final khelhah kum 20 mi hian tennis a khelh hun chhunga a title pahnihna la tur hian 6-3, 6-3 in hnehna a chang.

China-a inelna lianah Saba­lenka hi champion thei naupang ber a ni a, Belarusian nula hian tun season a hmang ṭha hle. August thla khan New Haven nomawi chawi turin Carla Suarez Navarro a lo hneh tawh bawk a ni.

Sabalenka chuan, "Court chhungah hian dawhthei taka awm ka zir a, ka duh ang chuan ka inzir chhuak niin ka hria. Hlawhtlinna chan hi ka beisei ve ṭhin a, chutihrualin player tel an ṭhat em avangin vanneih tel a ngai hle," tiin a sawi.