Palermo Open-ah Halep

Covid-19 vanga an chawlh hnuah Women's Tennis Association chuan August thlatir aṭangin inelna a buatsaih leh tawh dawn. Palermo Open an khelh turah Simona Halep chuan inlan a tum.

World number 2 Halep chuan, "Thutlukna chiang takin ka la siam lo, chutih rualin Palermo-ah chuan kal ngei ka tum. Tournament khel loa awm reng chu a hrehawmin a khawhar thlak hle. "Hun rei lote hnuah chuan thlamuang takin kan zin kual leh thei turah ngai ila, chumi hma deuh pawh chuan inkhelh a theih a nih chuan a kawng kan zawn chu a ngai a ni," a ti.

Kum 28 mi Halep hian February 22 khan Dubai Duty Free Tennis Championship final-ah Kazakhstan nula Elena Rybakina a hneh a, a hnu lamah match khelh a la nei leh rih lo. Wimbledon champion lai chuan sawi zawmin, "Hripui leng hian nunphung a ti khaihlak nasa em em a, kei ngei pawh ka nun dan a danglam vek a ni ber. Zin loa ina awm kha chu a ṭhatna lai a awm ngei mai, mahse inkhel thei loa awm reng chu a hrehawm a ni," a ti.

March thla aṭang khan mipa leh hmeichhe tennis inelna zawng zawng tih tawp lailawk vek a ni. Wimbledon pawh an ṭhulh hial, tunah hian US Open leh French Open chu khelh tumin hma an la mek thung, a tak ram a thleng dawn em tih erawh a la chiang lo.