Liverpool chak laiin City an tlawm

Premier League champion Liverpool-in an champion hnua an match hmasa berah Manchester City ngam lo mah se tlak hlau Aston Villa lakah an insiamṭha nghal a, 2-0 in an chak. 

League-ah Liverpool champion chiang tawh mah se season khata point hmu hnem ber record siam duhnain an rilru a la luah reng a, Sadio Mane leh Curtis Jones goal hmangin an chak. Hetihlai hian champion hlim Liverpool 4-0 ngawta lo sawp mualphotu Manchester City an mualpho ve leh ta thung a, Premier League-a inhamtan tum Southampton chuan 1-0 in an lo hneh!

Saints-in City an hneh rin ni lo mah se Che Adams-a goal hmangin Pep Guardiola naute an lo tlawm a, table-ah 13-na dinhmun luahin season tharah Premier League an khelh chhunzawm zel ang. 

Aston Villa-in tlak hlau chungin an khel a, Liverpool-in record tih loh khelh chhan em em nei tawh loin an khel thung - hei vang hian Reds an hriam tawk lo a, Villa zawk chu point thum nena hlawhtling mai tur angin vawi tam an lang hman. 

Mahse, Jurgen Klopp-a'n minute 61-naah bench lama hun a hmantir Roberto Firmino luhtirin inkhel a thlak danglam a, Reds hian minute 71-naah Sadio Mane hmangin goal hmahruai an khung. Goal luh hnuah champion team danglamna a lang a, chak tur zawk a chiang tawh tia sawi theih a ni - hun tawp nan minute khat chiah a awm tawh tihah Curtis Jones chuan a rawn khung ve leh a, Reds ṭantute tan hmuh nuam a tling ang. 

Kum 19 leh ni 157 mi Curtis Jones tan Premier League-a a goal hmnasa ber a ni a, Reds-a kum nga dang atana contract thar ziak hlim midfielder hi December 2017-a Trent Alexander-Arnold (kum 19 leh ni 80) hnua Liverpool tana Premier League-a goal khung thei naupang ber a ni. 

Liverpool legend huang chhunga dah ngam Pepe Reina chu Anfield-ah a kir leh ta a, tun ṭum erawh Aston Villa goal vengtu a ni - Reds tana inelna hrang hranga match 398 kheltu hian fans awm loh avangin a phu anga lawm erawh a hlawh thei lo. 

Reina hian kum 2005 khan Liverpool hi a zawm a, 2013-14 season-ah Napoli (loan) zawmin a chhuahsan. Bayern Munich tan kum khat a khelh hnuah 2015-16 season khan Napoli bawk a zawm leh a, 2018-19 khan AC Milan a zawm. Milan-ah beisei angin hmun a chang lo a, thlasik transfer lai khan Villa hi season tawp thleng atan loan-in a zawm. Spain tana vawi 36 inlan thei keeper hian Premier League Golden Glove vawi thum a dawng hman a, Liverpool tan FA Cup (1), League Cup (1), FA Community Shield leh UEFA Super Cup (1) nomawi a chawi hman. Kum 37 mi Reina chuan, "Kum sarih hnua Anfield-a ka kir leh thei hi ka lawm takzet. Fans ropui tak tak te nena hun kan hman theih loh avangin a pangngai ang chu a ni thei lo a, mahse he hmun hi chu ka tan a hlu reng dawn a ni," a ti. 

Premier League-a inhamtan duh Southampton-in team ṭha bik Manchester City chu English top flight football-a inhamtan nan an hmang a, nipui transfer laia Saints zawmtu Che Adams chuan league match 25-a a goal hmasa ber khungin Southampton a chhanhim. 

Adams hian season hmasa Championship match 46-a goal 22 a khung hnuin Birmingham City aṭangin Saints hi pound maktaduai 15-in a zawm a, goal a khung theih loh reng hnuah a khung ve ta. Southampton manager Ralph Hasenhuttl chuan, "Adams-a'n dressing room a luh hnua a ṭhiante nena a goal khung an lawm dan chu hmu u la, a khelhpui ten an duhsakzia in hmu thei ang. Engtiklai pawhin a thawkrim a, bul ka ṭantir kha thutlukna dik a nihzia min hmuhtir ta a ni," a ti. 

October-a Leicester City-in 9-0 a an sawp Saints hian Foxes laka an mualpho kha insiamṭhat nan an hmang a, league match nga khelh tur an la neihah Championship-ah an tla thei tawh lo. 

City manager Pep Guardiola-a'n champion Liverpool sawptu aṭangin player paruk a thlak danglam a, player thiam bik Kevin de Bruyne chu bench-ah dahin Spanish coach thutlukna a fuh tawk lo. Adams-a'n goal a khung hnuah City an harh zawk a, mahse Fernandinho-a'n post a tih per hnuah David Silva chuan a hun ṭha a chhawr thei bik lo - Saints goalkeeper Alex McCarthy chet ṭhat zan a ni a, Silva khung tur hi a dan bakah Gabriel Jesus hun ṭha chu a dansak bawk. 

Saints tan hian Nathan Redmond leh Danny Ings ten hun ṭha an nei ve tho a, goal an khung thei bik lo. November khan City hian si an phurh hmasak hnuah Saints hi 2-1 in an lo lehthal tawh a, tunah erawh thawnthu hlui an her lum thei lo. Hetihlaia thil lang chiang tak chu Sergio Aguero hmun ruak luah turin Gabriel Jesus a la puitling tawk lo tih hi a ni a, Argentine striker aṭangin zir tur a la ngah tih a lang.