Real Madrid leh Barcelona an chak

Pathianni zan La Liga inkhelah Real Madrid leh Barcelona ten hnehna an chang ve ve a, Spanish top flight league-ah champion tur a chiang lo zel. 

Real Madrid hian an mikhualna ramah Athletic Bilbao chu 1-0 in an hneh a, Sergio Ramos chuan inkhela goal awmchhun hi penalty hmangin a khung. Madrid khaw club chak thu hre sain Barcelona chuan Villarreal an lenchilh a, Champions League khelh tum team hi 4-1 ngawtin an sawp. Real Madrid-in table chung ber an luah chhunzawm zel a, an hnuai chiahah Barcelona an awm - team pahnih inthlauhna hi point li a ni a, Real hian match li khelh tur an la neihah vawi thum hnehna an chan chuan an champion ang. 

Bilbao khelmualah Real-in goal khung turin an nghah rei a ngai a, minute 73-naah penalty an hlawh chhuak hram. Bilbao midfielder Dani García chuan Marcelo a ti tlu a, VAR hmanga ennawn a nih hnuah penalty pek an ni. 

Real Madrid tan Ramos a lo pen chhuak a, goal-a chantir turin harsatna a nei lo. Spanish defender hian Real leh Spain tan a zawnin vawi 22 penalty a khung tawh a, tun season-ah goal 12 a khung tling ta. 

Athletic Bilbao lamin Real an chhaih buai ve hman meuh lo a, Belgian goalkeeper Thibaut Courtois chuan vawi khat bak save neih a mamawh lo. Courtois hian tun season La Liga-ah vawi 17 clean sheet a nei tawh a, Francisco Buyo (1994-95) hnua Real tana La Liga season khata heti zat clean sheet nei leh thei hmasa ber a ni. 

Barcelona-in Celta Vigo leh Atletico Madrid a zawna an inhnehtawkpui hnuin harh tharna an chang a, an mikhualna ramah Villarreal chu 4-1 in an sawp. Barca hian minute thumna lekah goal hmahruai an khung nghal a, Jordi Alba cross aṭanga ball kal chu Villarreal  defender Pau Torres chuan an lamah a ti lut. 

Gerard Moreno chuan minute 14-na lekah mualneitu team tan an si phurh rawn sut nghal mah se Barca an chi ai duh lo a, Luis Suarez leh Antoine Griezmann te chuan first half tawp hmain goal khat ve ve an rawn khung. 

Hun tawp nan minute li chiah a awm tawh a, chak tur pawh a chiang tawh. Mahse, Barca rawlthar Ansu Fati chuan goal khungtu zinga a hming nem kai ve duhin a rawn khung leh a, 4-1 in Barca an chak. 

Catalan club ṭantute tan chuan Lionel Messi, Suarez leh Griezmann te inkawp chu hmuhnawm a tling a, player pathum hian an khelh fuh ni chuan khawvela tlarhma inkawp hlauhawm ber an ni thei tih an pholang. Suarez-a'n Barca goal hnihna a khung theih nana midfield-a ball changtu Messi che vel a hmuhnawm a, Griezmann-a goal khung tur pawh 'backheel' hmanga a siamsak a ni. 

Messi hian tun season La Liga-ah vawi 19 assist a nei tawh a, 2010-11 a amah vekin heti zat assist a lo neih tawh hnua Spanish top flight season khata assist ngah ber record a siam. Argentine forward hi goal khungtu zinga a hming a lan loh avangin a vanduai tih pawhin a sawi theih - a goal khung chu video assistant referee rawn a nih hnuah offside vangin pawm a ni lo a, a freekick hmangin crossbar a tih per bawk.