Matic-a'n contract thar a ziak

Manchester United chuan midfielder Nemanja Matic chu June 2023 thleng atana contract an pawhsei thu an puang. Serbia international hi August 1 hian kum 32 a tling dawn. United hian kum 2017 khan Chelsea aṭangin pound maktaduai 40-in Matic hi an lalut a, Red Devils tan vawi 114 khelin nomawi erawh a la chawi pui lo. 

United boss Ole Gunnar Solskjaer chuan, "Contract thar a ziak hi a lawmawm. A tawnhriat te, hruaitu ṭha an nihna leh a hna a hriat chianna te hi player naupang zawkte tan inzirna ṭha tak a ni ngei ang. Midfield-ah kan chak ṭha a, hemi kawngah hian Matic hi a pawimawh hle," tiin a sawi.

Covid-19 hnuah Paul Pogba leh Bruno Fernandes an inkawp a, United khelh danin fak hlawh chho hle. Midfielder langsar pahnihten duh tawka an nawr theih nan Matic hian tlarhnung a pui a, a hnathawh hi langsar tawk lo mah se football hrethiam chin chuan a ṭangkai zia hmu thiamin United-in result ṭha an neih chhanah an ngai.

Contract thar ziah zawhah Matic chuan, "Club ropui taka ka khel chhunzawm tur hi ka lawm. Player ka nih angin tih theih tam tak ka la nei a, Manchester United tana ka theihna ka hmang thei tur hi ka lawm. Kan team-ah hian kum naupang zawk leh tawnhriat tam zawk kan inchawhpawlh ṭha a, min ṭantute lawmna siam turin season pawh ṭha taka khar kan tum ang," tiin a sawi.