FA Cup a hmuhnawm ; Man United an tla, Hammers leh Chelsea an chak ṭawk ṭawk

Khawvela football inelna upa ber FA Cup danglam bikna tunkar tawp khan hmuhin a awm. Old Trafford-ah Middlesbrough-in penalty shootout hmangin Manchester United an hneh a, West Ham United-in fourth round-a team tenau ber Kidderminster Harriers chu extra time-ah an hneh ṭawk. Chelsea pawhin League One club Plymouth Argyle hneh turin extra time an mamawh bawk.

United an mualpho
Zirtawpni zanah Manchester United-in Championship club Boro an mikhual a, Ralf Rangnick-a hote tan harsa tur awmin a lang lo. Mualneitu hian bul pawh an ṭan ṭha a, chance a hlah hnem. Cristiano Ronaldo-a'n a kum 37 piancham lawm nan penlaty hmanga pet goal theihna remchang nei mah se goal zawnah a pet lo.

Amaherawhchu inkhel thununtu Man United tan Jadon Sancho-a'n minute 25-naah goal hmahruai a khung a, chance ṭha an hlah zel erawh an tuar. Boro-in minute 64-naah Matt Crooks hmangin siphurh an sut a, ball-in Crooks goal khung tur siamsaktu Duncan Watmore kut chiang takin a fuh.

VAR hmanga ennawn a ni mah se referee-in goal-ah a pawmsak a, a pawm chhan hi IFAB-in nikuma dan thar a siam vang a ni. Dan tharah hian goal khungtu hi a handball chauhin hrem tur tih a inziak a, a siamtu zawk a handball avangin an pawm.

Boro-in siphurh an sut hnuah pawh Man United-in chak theihna hun ṭha an nei a, goal hmaah an hriam tawk lo. Extra time-ah goal a lut lo a, penalty shootout hmangin chak zawk an zawng. David de Gea aia lut Dean Henderson-a'n penalty vawi riat a hmachhawnah pakhatmah a dang lo a, Man United rawlthar Anthony Elanga-a'n chiang takin a pet over.

Man United mualphona belchhah turin halftime laiin stadium announcer-in, "Technical lamah harsatna a awm avangin halftime laiin ei leh in zawrhchhuah a ni dawn lo," tiin a puang a, entu mipui an lungawi lo. 'Glazer Out' tihin an au zui.

Manchester United manager Ralf Rangnick chuan, "First half-ah khan awlsam taka 3-0 ni thei a ni a, hun pangngaiah chak thei tur kan ni. Penalty-ah erawh tupawh chak thei an ni thung. Chutihrualin Boro goal khung dan erawh ka hrethiam lo, a kutin ball a la thlaa a, an pawm kha a dik lo," tiin a sawi.

Hammers-in an harsat
FA Cup fixtures an siam zawhah West Ham an vanneiah a ngaih theih a, a chhan chu an khingpui Kidderminster hi National League North club an ni. Premier League leh division six inkar a zau a, Aggborough-ah khelh ni mah se Hammers tan harsa tur niin a lang lo.

Amaherawhchu, FA Cup-ah thilmak a thleng fo a, Kidderminster Harriers-in minute 19-naah Alex Penny hmangin an khung hmasa zawk. Hammers an talbuai a, minute 90 chhungin siphurh an sut thei lo. Injury time-ah Declan Rice hamngin an khung a, extra time an khel thei hram.

Extra time-ah pawh goal khung an harsat a, injury time-ah bawk Jarrod Bowen-a'n chakna goal a khung. Hammers-in Kiddy 2-1 in an hneh a, National League North club-in Premier League club an barakhaih teuh hle. Division four hnuai lam club aṭanga Premier League club hneh thei chu Luton Town leh Lincoln te an ni a, kum 2013 leh 2017 khan Norwich leh Burnley an hneh. Kiddy hian hnehna chang se FA Cup thilmak zingah chhiar tel a ni ang.

Extra time-ah Chelsea
Chelsea-in Stamford Bridge-ah League One club Plymouth Argyle an mikhual a, chak turin minute 120 an mamawh bakah hun tawp thlengin inkhel a hmuhnawm. Minute riatna lekah Jordan Houghton cross chu Macaulay Gillesphey-a'n an tauh goal a, stadium-a mikhual team ṭantu mi 6,000 thawm a ring hle.

Thomas Tuchel-a hoten inkhel an thunun a, an phu ang ngeiin Cesar Azpilicueta hmangin minute 41-naah siphurh an sut. Chelsea-in goal an khung belh theih loh avangin extra time khelh a ni a, first half hun pek belhah Kai Havertz-a'n chakna goal a khung. Blues tan Havertz goal hlut tluk zetin Kepa Arrizabalaga penalty save a pawimawh a, Spanish keeper hian hun hmain Ryan Hardie penalty pet a dang.

Chelsea hian shot vawi 41 shot an nei a, corner 20 an hlawhchhuah bawk avangin chak an phu. Amaherawhchu vanduai niah chuan chak lo thei dinhmunah an ding a, an vannei zarah fifth round an lut. German manager Tuchel-a'n Covid-19 a kai avangin a naute a ho thei lo.

FA Cup Fourth Round
February 4, Zirtawpni
Manchester United 1 - 1 Middlesbrough
Penalty Shootout-ah Middlesbrough 8-7 in an chak
MNU : Jadon Sancho 25'
MID : Matt Crooks 64'

Penalty Pet dan
Man United Boro
Mata G Howson G
Maguire G Tavernier G
Fred G Bamba G
Ronaldo G Watmore G
Fernandes G Fry G
McTominay G Peltier G
Dalot G McNair G
Elanga X Payero G

February 5, Inrinni
Chelsea 2 - 1 Plymouth Argyle
CHE : Cesar Azpilicueta 41'; Marcos Alonso 105+1'
PLY : Macaulay Gillesphey 8'
Kidderminster Harriers 1 - 2 West Ham United
KID : Alex Penny 19'
WHU : Declan Rice 90+1'; Jarrod Bowen 120+1'
Crystal Palace Feb-00 Hartlepool United
Huddersfield Town Jan-00 Barnsley
Peterborough United 2 - 0 Queens Park Rangers
PET : Joe Ward 25'; Ricky-Jade Jones 71'
Southampton 2 - 1 Coventry City
SOU : Stuart Armstrong 63'; Kyle Walker-Peters 112'
CON : Viktor Gyokeres 22'
Everton 4 - 1 Brentford
EVE : Yerry Mina 31'; Richardlison 48'; Mason Holgate 62'; Andros Townsend 90+1'
BRE : Ivan Toney 54' (P)
Stoke City 2 - 0 Wigan Athletic
STO : Josh Maja 14'; Jacob Brown 62'
Manchester City 4 - 1 Fulham
MNC : Ilkay Gundogan 6'; John Stones 13'; Riyad Mahrez 53' (P), 57'
FUL : Fabio Carvalho 4'
Wolverhampton Wanderers 0 - 1 Norwich City
NOR : Kenny McLean 45+1'
Cambridge United 0 - 3 Luton Town
LUT : Reece Burke 16'; Carlos Mendes Gomes 23'; Admiral Muskwe 88'
Tottenham Hotspur 3 - 1 Brighton & Hove
TOT : Harry Kane 13', 66'; Solly March 24' (OG)
BRI : Yves Bissouma 63'
- FA Cup fourth round-ah hian team 32 an awm.
- Nizan khan fourth round khelh zawh a ni a, fifth round fixtures pawh a ni nghal bawk.