Under-19 Cricket World Cup roreltu India

Inrinni zan khan Antigua, West Indies-ah Under 19 Cricket World Cup final khelh a ni a, India-in wicket lia England hnehin an champion. U19 World Cup hi vawi 14 neih a ni tawh a, India hian vawi nga champion tawhin nomawi chawi ngun ber an ni. India hnuaiah hian Australia (3), Pakistan (2), Bangladesh (1), South Africa (1), West Indies (1) leh England (1) te an awm.

Tun ṭum inelnaah hian India leh England te hi mahni khingpui hneh veka group stage paltlang an ni a. Final lut turin India hian quarterfinal-ah Bangladesh an hneh a, semifinal-ah Australia an hneh leh bawk. England hian knockout stage-ah South Africa leh Afghanistan te hnehin final an lut.

Final-ah hian England-in bat hmasa an thlang a, James Rew-a'n 95 runs siam mah se thlawptu ṭha a nei lo. India bowler Raj Bawa-a'n wicket nga lain 31 runs chauh a pe a, Ravi Kumar pawhin wicket li lain 34 runs chauh a siamtir. England hi over 44.5-ah 189 runs siama an thih fai vek avangin India dinhmun a ṭha.

Amaherawhchu India opener Angkrish Raghuvanshi-a'n run engzatmah siam loin pavillion-ah a kir a, England bowler lakah India batter ten run siam an harsat avangin final nung tak chhawp chhuah a ni. India tan Shaik Rasheed (50) leh Nishant Sindhu (50*) ten half century an siam a, Bawa-a'n 35 runs rawn siam bawkin over 47.4-ah 195/6 runs an siam a, hnehna an chang.

Chandigarth rawlthar Bawa chu final-ah hian man of the match-ah thlan a ni a, inelna pumpuiah erawh run siam tam ber South Africa batter Dewald Brevis (506) chu player of the series a thlan a ni.