Man City class a sang

FA Cup fourth round-ah Manchester City-in Inrinni zan khan Fulham an mikhual a, Championship club-in Fabio Carvalho hmangin minute lina lekah khung hmasa mah se mualneituin goal liin an chhanglet a, 4-1 in an chak. Man City tan tan hian Ilkay Gundogan leh John Stones ten first half-ah goal khat ve ve an khung hnuah Riyad Mahrez-a'n second half-ah goal hnih a khung belh.

Season ṭan hmain Man City hi striker neih loh vangin sawisel mah se tun season inelna hrang hrangah goal 87 an khung der tawh a, player 18-in goal an khung tawh. Pep Guardiola hote tana goal khung tam ber chu Mahrez a ni a, Algerian winger hian goal 15 a khung.

Man City hi League Cup-ah tla tawh a, chutihruain inelna lian pathum Champions League, Premier League leh FA Cup-ah champion an la beisei vek. Pep-a hote hian league-ah Brentford leh Norwich City an hmachhawn ang a, February 15, Thawhlehni zanah Sporting Lisbon nen Champions League last 16 first leg an khel ang.