Lampard hnuaiah Everton-in bul an ṭan ṭha

Everton-in manager Frank Lampard hnuaia an khelhna hmasa berah Premier League club Brentford chu 4-1 in an sawp a, FA Cup fifth round-ah an inpetkai. Stamford Bridge-a inkhelah hian Toffees tan Yerry Mina, Richardlison, Mason Holgate leh Andros Townsend ten goal khat ṭheuh an khung a, Bees-in 2-0 a nih laiin Ivan Toney penalty hmangin goal khat an khung ve bawk.

Inkhelh ṭan hmain Everton-in an player thar Donny van de Beek leh Delle Alli te an pho chhuak a, FA Cup-ah an chhawr lo. Manchester United aṭanga loan hmanga an lak Van de Beek leh Spurs aṭanga an lakluh Alli te hi February 8, Thawhlehni zana Newcastle United an tlawh hunah an chhawr theih a beiseiawm. Alli man zat hi a chet ṭhat dan a zirin pound maktaduai 40-ah a pung chho thei hial.

Everton hian kuminah Hull City chiah an la hneh a, FA Cup third round hi khualmualah an khelh avangin Bees laka hnehna an chan hi kumin chhunga Goodison Park-a an chakna hmasa ber a ni. Lampard hnuaia an match hmasa berah goal an khung tam ringawt lo a, inkhel an thunun bawk avangin Toffees ṭantute tana lawmna tham a tling.

Brentford erawh an khel ṭha tawk lo a, an player thar Christian Erisken an la chhawr thei lo. Thomas Frank leh a hoten tan Premier League-ah a insawrbing theih tawh dawn a, league match hnuhnung palia an chak loh hnuah February 9, Nilaini zan hian champion lai Manchester City khelmual Etihad Stadium an tlawh dawn. Hmabak a huphurhawm hle.