ISL: Top four boruak a 'hot' tial tial
Bengaluru-in an harhtharna chan an chhunzawm zel a, Inrinni zan khan top four ni tura an elpui Jamshedpur FC chu 3-1 in an hneh - table-ah pathumna an ni ta.
Jamshedpur-in minute khatna lekah Daniel Chima Chukwu hmangin goal hmahruai an khung a, Bengaluru an hawihai. Mahse, second half-ah Bengaluru tak tak an inlar a, ISL semifinal khelh ngei an duh tih pholangin Sunil Chhetri chuan minute 55-naah si phurh sutna goal a rawn khung.
India captain Chhetri-a tan tun season ISL-a goal hnih a khung vena chiah a ni a, chutihrual chuan ISL pumpuiah erawh goal 49 a khungna a ni thung. ISL-a goal khung hnem ber record chelh mektu Bartholomew Ogbeche a nih rual.
Bengaluru-in an duhtawk mai lo - Cleiton Silva chuan minute 62-na leh hun pek belh minute thumnaah a rawn khung ve leh a, hun a tawp meuh chuan hma taka 1-0 a hmahruaitu Jamshedpur hi 3-1 in an tlawm.
Jamshedpur an tlawm avangin table-ah palina an ni ta hram a, chutihrual chuan an hneh loh Bengaluru ai hian match hnihin an khel tlem tih hriat a ṭha - an inthlauhna hi point khat chauh a nih bawk avangin Bangalore club tan lungmuan a la hun lo.
Men of Steel (Jamshedpur) tlawm zanah Mizo left back Ricky Lallawmawma leh right back Laldinliana Renthlei ten sulhnu hriatreng tur an hnutchhiah - JFC fullback pawimawh pahnih hian ISL match 50 an khel tling ve ve chiah!
Durtlang tlangval Ricky hian Aizawl FC aṭanga a career ṭanin Chanmari FC leh Zo United tan Mizoram Premier League a khel leh a, a hnuah Aizawl FC, DSk Shivajians leh Mohun Bagan tan I League a khel.
2018-19 season ṭan dawn khan ATK a zawm a, Kolkata club tan match 17 a khelhsak a, 2019-20 ah khelhna hmun a chan loh hnuin JFC hi season hmasa ṭan dawn khan a zawm - match 33 a khelhsak a, ISL-ah match 50 zet season thum chhungin a khel hman!
Armed Veng South tlangval Laldinliana hian MPL club Chhinga Veng FC aṭanga bul a ṭan hnuin 2017-18 season kha Aizawl FC tan I League a khel a, 2018-19 season khan Chennaiyin chuan Chhinga Veng aṭang hian an lei chhuak.
Chennaiyin tan hian 2019-20 season thleng kha a khel a, league match 22 a khel hman - season hmasa khan Jamshedpur hi a pan a, Men of Steel tan league match 28 a khel leh der tawh.
Mizo defender pahnih hian tun season ISL-a match 13 an khelh tawhah an khel kim ve ve a, assist vawi khat ve ve an nei tawh bawk. Dinliana chuan, "Match khelh tur a la tam a, semifinal hi chu kan khelh ngei ka ring," tiin Vanglaini a hrilh a, beisei a la nei sang hle.
Hetihlai hian NorthEast United an tlawm leh tawh a, Zirtawpni zan ISL inkhelah Kerala Blasters chu 2-1 in an ngam lo. South Indian club tan Jorge Pereyra Diaz chuan minute 61-naah goal hmahruai a khung a, minute 71-naah Blasters midfielder Ayush Adhikari hnawhchhuah a nih avangin Highlander beiseina a sang.
Mahse, Blasters lamin Alvaro Vazquez hmangin an khung leh a, minute 90-naa NorthEast tana Irshad-a goal khungin awmzia a nei phak lo - Highlander tan Joe Zoherliana'n inkhel bul a ṭan a, he inkhela Mizo player inlan awmchhun a ni.