Comeback ropui lantirtu Cameroon

Africa Cup of Nations-a pathumna nih inchuh inkhelah Cameroon-in goal thum zet chhuah hmasa mah se Burkina Faso lakah comeback ropui an lantir a, 3-3 in an inhnehtawk.

Minute 90 chhunga chak zawk an awm loh avangin penalty hmanga chak zawk zawn a ni zui a, inelna thlengtu Cameroon hian 5-3 in penalty-ah hnehna an chang a ni.

Ahmadou Ahidjo Stadium, Yaounde khawpuia inkhelah rin hlawh lo zawk Burkinabe an che thei viau - Steve Yago chuan minute 24-na lekah goal hmahruai a khung a, Issa Kabore siamsak a ni.

Manchester City right back, French club Troyes-a loan-a khel mek hian minute 43-naah an goal hnihna a thawk chhuak ve leh a, mual sir aṭanga a ball cross chu Cameroon keeper Andre Onana chuan an lamah a beng lut.

Goal dang lut loin chawlhlawk hman a ni a, second half-ah pawh Burkinabe bawkin goal an khung hmasa - Djibril Ouattara chuan minute 49-naah a tauh lut a, chak tur a chiang tawhah a ngaih theih.

Mahse, mipui puihna nen Cameroon an beidawng duh lo. Ligue 1 club Angers striker Stephane Bahoken chuan minute 71-naah si phurh a rawn sut ṭhen a, Cameroon an phur sawt - captain Vincent Aboubakar chuan minute 85 hnu lamah goal hnih a rawn khung ve leh a, 3-3 in a tawp der!

AFCON-a pathumna inchuh inkhelah extra time khelh a ni lo a, minute 90 hnuah penalty hmangin chak zawk zawn nghal a ni - Cameroon tana pettu ten an pet goal vek laiin Blati Toure chuan Burkina Faso tan a chhuih lut thei lo a, 5-3 in penalty-ah an tlawm ta a ni.

Cameroon tana goal hnih khungtu Aboubakar-a'n tun inelnaah match sarih khelin goal riat ngawt a khung tling ta a, nizana final khel Senegal leh Egypt player zingah Saudi club Al Nassr striker Aboubakar hnaih bertu chu Sadio Mane (3 goals) a nih avangin top scorer a nih ngei a rinawm - nizan final hi he thu buatsaih a nih lai hian result kan hre hman lo.

February 5, Inrinni Zan (Third Place Play-Off)
Burkina Faso 3 - 3 Cameroon
BUR: Steve Yago 24'; Andre Onana 43'; Djibril Ouattara 49'
CAM: Stephane Bahoken 71'; Vincent Aboubakar 85', 87'
*Penalty-ah 5-3 in Cameroon an chak
February 6, Pathianni Zan (Final - Result kan hre hman lo)
Senegal 12:30 AM Egypt

Penalty pet dan
Burkina Faso
Issa Kaboré G
Soumaïla Ouattara G
Blati Touré X
Steeve Yago G

Cameroon
Vincent Aboubakar G
Moumi Ngamaleu G
Karl Toko Ekambi G
Pierre Kunde G
Ambroise Oyongo G