Chak lo Inter tan nomawi a hla

Player 10 a khel Bologna lakah Inter Milan 2-1 in an tlawm a, manager Antonio Conte naute hi Serie A table-ah pathumna la ni mek mah se an tan nomawi beiseina a thamrala ngaih theih a ni.

Lazio an chetsual bawk avangin champion lai Juventus chuan fal takin hma an hruai leh tawh. Inter hian Turin club an phak lohna chu point 11 zet a ni ta, league match khelh tur pariat an la nei. Juve tan a zawna a vawi kua nan nomawi chawi beiseina a sang.

Pathianni zan San Siro-a inkhelah Inter lamin striker palian Romelu Lukaku hmangin minute 22-naah goal hmahruai an khung, forward Lautaro Martinez ball tauh in a ban a per hnua rawn let chu Belgium international hian a thun.

Second half minute 57-naah Bologna midfielder Roberto Soriano chu hnawhchhuah a ni a, defender Mitchell Dijks-a'n penalty a chawi bawk. Martinez chuan goal hnihna khung ngei tumin penalty chhuih mah se keeper Lukasz Skorupski chuan a dansak.

Bologna lamin minute 74-ah Musa Juwara hmangin siphurh an sut a, goal an neih aṭanga minute thum lekah Inter defender Alessandro Bastoni chu yellow card pahnihna hmuh vangin hnawhchhuah a ni. Team pahnih player 10 ve ve an ni chiah, chak tur a la chiang lo. Point an insem mai dawn nia a lan laiin Inter tlanghnung inthlahdah karah Musa Barrow chuan chakna goal a khung - Inter lamin a chhanletna an nei tawh lo.

Season tir lamah Inter Milan an kal filawr a, season chawhnu lamah erawh an zuih hle. Covid-19 vanga an chawlh hnu, football an khelh chhunzawm leh tirh khan Antonio Conte chuan, "Match khelh hmabak zawng zawng chu final vek a ni," tiin a sawi.

Italian manager hian hnehna chan duhin inkhel ngai pawimawh viau mah se beisei an phak thei lo, hripui len hnua a vawi hnih nan an tlawm. Ningani zanah Hellas Verona an lenchilh leh dawn a, a awlsam chuang lo ang.

Conte chuan, "Thinurna, lungngaihna leh hrehmawn a lo thleng a, mawhphurtu chu keimah ka ni. Inkhel kha kan thlir kir a nih chuan nuamsa taka thawk thei kan ni, amaherawhchu hun ṭha kan bawhpelh bakah kan chesual bawk.

"Holam taka ball hloh kan ngah, ball kan hloh hnuah kan chuh let na tawk lo bawk. A tawi zawnga sawi dawn chuan vanduai theih dan chi hnihin kan vanduai," a ti. Penalty an hlah bakah player tam zawk an nih laiin an khung thei lo a, an player an hloh zui ve leh bawk a ni.

Atalanta lakah Napoli chak tluang lai a tawp a, an match neih leh hmasakah erawh hnehna an chang. Gennaro Gattuso naute hian an elpui AS Roma chu mikhualin 2-1 in hnehna an chang a, European football an beiseina a nung zui zel.

Napoli tana second half-a Callejon goal khung chu Roma lamin Henrikh Mkhitaryan hmangin sut ve leh mah se hun tawp hma deuhin captain Lorenzo Insigne chuan mawi takin chakna goal a pet kual lut. Chakna goal khungtu Insigne chuan tun hnaia harhtharna an chan theih chhan chu coach Gennaro Gattuso a nih thu a sawi. Italian forward chuan, "Atalanta kan hneh loh hnuah match ṭha takin kan khel thei leh ta, chanchin ṭha leh lawmawm a ni.

"Coach Gattuso hian phurna min siam thiam a, rilru hnual leh beisei nei tlem taka kan awm lai pawhin ani chuan min fuih phur reng," a ti. Napoli hian Gattuso kaihhruaina hnuaiah Juventus hnehin Coppa Italian nomawi an chawi tawh.

Serie A Results

Inter Milan    1 - 2    Bologna

Cagliari    0 - 1    Atalanta

Parma    1 - 2    Fiorentina

Udinese    2 - 2    Genoa

Brescia    2 - 0    Hellas Verona

Sampdoria    3 - 0    SPAL

Napoli    2 - 1    AS Roma