Giroud hoin AC Milan an chungnung
Serie A champion nih tum pahnih inkhelah AC Milan chuan Inter Milan 2-1 in an hneh. Milan tan striker Olivier Giroud-a'n si phurh a sut bakah chakna goal a khung a, hun tawp dawna Theo Hernandez hnawh chhuah an tuar hman lo.
Inrinni zan San Siro-a hnehna changtu Milan hian an chunga awm Inter nen an inkar an ti zim. Champion lai leh hmahruaitu ni bawk Inter hi point khat chauhin an sang tawh, chutih rualin Simone Inzaghi naute hi match khatin an khel tlem thung.
Inkhel dangah Jose Mourinho kaihhruai AS Roma chu goal khung loin Genoa nen an inhnehtawk. Champions League khelh beisei zinga mi Lazio erawhin Fiorentina 3-0 a hnehin parukna dinhmun an luah.
A hmuhnawm
Edin Dzeko leh Lautaro Martínez ten ball an inpek kual hnuah, midfielder Nicolò Barella-a'n hun ṭha nei mah se hnai tak aṭangin goal pawnah a pet chhuak. Denzel Dumfries-a shot chu ṭha viau mah se keeper Mike Maignan-a'n a lo dang hman.
Inkhela chungnung zawk Inter-in goal neih an harsat. Milan aṭanga an lakluh Hakan Calhanoglu-a corner pet chu changtu nei lo Ivan Perisic chuan lei a thlen hmain tawih zetin a lo hem a, goal kilah lutin a team hma a hruai pui.
Champion tum Milan tan thapui thawh a ngai, minute 75-naah Giroud chuan Brahim Diaz-a shot an tih per chu a lo tlawh goal hram - striker awmna tur hmuna a awm vang a ni. Arsenal striker hlui hian a hnu lawkah box chhunga a ball chan chu vir puin chakna goal a khung.
Hmabak a la tam
Hnehna an chan hnuah AC Milan manager Stefano Pioli chuan tih tur an la ngah thu a sawi a, season chawhnu lam chu an tan fiahna tak a nih tur thu a sawi bawk. Milan hian nikum khan an hmahruaina an hum tluan thei lo.
Pioli chuan, "Season hmasa khan tun ang huna kan point hmuh ang zat tho hi kan hmu. Ka naute chu beiseina nei reng turin ka fuih. Chet fuh loh chang chu nei ve bawk mah ila team ṭha tak kan ni tih kan lantir thei hi ka lawm.
"A nihna tak sawi chuan Serie A team ṭha ber kan hneh thei," a ti. Milan hian 2010-11 season hnu lamah Serie A nomawi an la chawi leh lo, league champion an nih hnuhnung ber aṭanga chhiarin Pioli hi an manager pariatna a ni hial.
Chak lo Inter
Antonio Conte thlaktu Simone Inzaghi-a'n team a din nghet leh tawh viau, chutih rualin fal taka kal erawh an la harsat. An khelh hmabak pakhata an chak a nih erawh chuan point liin an la sang fal thei dawn, an dinhmun a la duhawm hle.
Italian manager Inzaghi chuan, "Kawng engkimah kan chungnung zawk, a bik takin hun tawp dawn minute 20 chhung phei kha chu kan nawr na hle. Mahse, football-ah chuan vanduai chang hi a awm ve ṭhin, chumi chu kan tawng fuh," a ti.
Inter hian an khelmualah league match chak loh an nei khat hle. Kum 2020 October thla kha an chak loh hnuhnung ber chu a ni a, an hneh loh chu AC Milan tho hi niin, striker Zlatan Ibrahimovic chuan goal hnih a khung.