Burnley-in Hodgson-a 'Watford' an chelh

FA Cup khelh a nih avangin kartawpah Premier League match khat chiah khelh a ni a, Roy Hodgson-a hnuaia an match hmasa berah Watford chu mualneitu Burnley chuan 0-0 in an lo chelh - ruah sur nasat avangin team pahnih inkhel a nung tawk lo.

Watford-in hnehna an chan zawh loh avangin relegation zone-ah an awm chhunzawm a, table-ah 18-na an ni mek - an chung chiaha awm Norwich City chu point khat chiahin an phak lo a, match khatin an khel tlem bawk.

Premier League aṭanga la relegate ngai lo Hodgson chuan, "Thla sarih aia rei zawk chawl tura inbuatsaih ka ni a, mahse, Watford hian an duh ka pe thei ang tih rinna nei turin min hmin a ni.

"Hetiang ang harsatna hi chu ka lo tawk fo tawh a, mahse, kan hnathawh dan ka thlirin Premier League-ah kan inhamtan ka ring - player te ang thoin hna hautak ka nei a, Watford kan chhanhim a ngai a, chutiang tur chuan kan thawk zel bawk ang," a ti.

Burnley an hriam lo
Turf Moor-a inkhelah mualneitu Burnley chungah beiseina a sang a, mahse, pound maktaduai 12-a striker Wout Weghorst an lei chungin tlarhmaah Burnley an la hriam tawk lo.

Netherlands international Weghorst hian James Tarkowski-a siamsak chu khungna remchang a nei a, goal-ah a chantir thei tlat lo - mahse, kum 29 mi striker hi VfL Wolfsburg tan match 144-a goal 70 khung thei a ni a, rei tak 'nil' lo tura ngaih a ni.

Maxwel Cornet chuan chance duhawm a nei bawk a, mahse, a chhawr thei bik lo. Clarets (Burnley sawina) captain Ben Mee chuan first half tawp lamah an lamah a ti goal ṭep a, Watford an vannei teuh hle.

Burnley-in Premier League match hnih chu a zawnin goal an khung ta lo a, vawi khat chiah an la chak - match 19-a point 13 neiin table mawngphah an luah mek a, 17-na Norwich chu point thumin an phak lo a, match thumin an khel tlem thung.

Hello Hodgson
Kum 74 mi a ni tawh a, coaching career duhawm tak a hman tawh avangin Hodgson hian Watford enkawl lo pawhin chawl hahdam a, nuam taka hun hman a phu tawh. Mahse, he English coach tan hian nun chu football a ni tlat.

Hodgson chuan, "Thli leh ruah khan kan game kalphung a thlak danglam avangin ruah a sur tih chu ka hre ngei a, mahse, chawlhlawka ka inhmuh chiah khan ruah sur nasatzia ka hria," tiin ruah sur pawh hre mang loa a naute inkhel a en tui thu a sawi!

A career-a club 17-na enkawltu Hodgson tan lawmna tur a awm - goal an chhuah lo a, Premier League match 31 hnua Watford-in goal an chhuah loh hmasak ber a ni. Goal khungna chance pawh an nei a, mahse, Joao Pedro leh Tom Cleverly te vanneih zan a ni lo.

Watford-in midfield-ah Moussa Sissoko leh Edo Kayembe hmangin midfield an thunun hneh viau bawk a, Hodgson-a hnuaiah enge an an chhoh zel dawn, tih chu thil hriat châkawm a ni ta.