Club World Cup-ah Al Ahly-in semifinal an lut

FIFA Club World Cup chu February 3, Ningani aṭang khan UAE-ah khelh ṭan a ni a, European champion Chelsea leh South American champion Palmeiras te chu semifinal aṭangin an inlan ṭan chauh ang. African champion Al Ahly chuan Inrinni zan khan CONCACAF aiawh Monterrey 1-0 a hnehin semifinal an lut.

Club World Cup-ah team pasarih an tel a, khawlmualpui champion ṭheuh bakah inelna thlengtuin club pakhat an thawh. First round-ah hian inelna thlengtu club Al Jazira leh Oceania aiawh AS Pirae te an inkhel ang a, Al Jazira 3-1 in an chak. Al Jazira hian nizan khan Asian champion Al Hilal an hmachhawn a, result kan hre hman lo. Al Jazira leh Al Hilal inkhela chak zawk hi semifinal-a Chelsea hmachhawn tur a ni.

Egyptian club Al Ahly hian February 8, Thawhlehni zanah Palmeiras nen semifinal an khel ang. Semifinal hnuhnung zawkah Chelsea an inlan dawn a, Thomas Tuchel-a hote hian February 9, Nilaini zanah Al Jazira leh Al Hilal nen final khel tur an zawng ang.