Williams tan Eubank Jr. a u hret

British boxer rothap Chris Eubank Jr. chuan a world title beiseina a chhi nung zel a, Inrinni zan khan Liam Williams chu unanimous decision (116-109, 116-108 & 117-109) in an hneh.

Eubank chuan, "Ka khelh danah ka lawm a, Liam hian kan inhnek hmaa ṭawngkam mawi lo tak tak a hman avangin zirlai pek ve hlak kha ka châk hrim hrim a ni," a ti a, Cardiff khawpui ngeia khawtual tlangval Williams a hneh hi a inchhuang hle.

Kum 32 mi boxer hian round hmasa paliah Williams hi vawi thum zek chu a hnek thlu hman a, round 11-naah vawi khat chu a hnek thlu leh bawk - a knockout loh chhan chu a hrem duh vang niin a sawi!

IBO super-middleweight title vawi hnih ngawt lo hlawh chhuak tawh Eubank chuan, "Hrem ka duh avangin round khatnaah khan ka knockout duh lo mai zawk a ni. A inhnek dan en phei kha chuan disqualify a ni lo kha a mak zawk hial. Mahse, mipa takin ka hmachhawn a, ka intiam ang ngeiin ka hrem ta bawk.

"Min sel ṭhintute an hmuh ngai loh ka hmel lehlam ka hmuhtir a, fight-ah khan hmanhmawh duh ni ila, awlsam takin ka chingfel ang. He game-ah hi chuan mahni level hriatchian a ngai a, kan ngam loh lutuk turte laka ṭawngkam thlahdah ve ngawt hi awmzia a awm lo," a ti a, hneh tak Williams a kap zui.

English boxer Eubank Jr. hian vawi 34 inhnek a hmachhawnah vawi 32 hnehna changin vawi hnih a tlawm a, a hneh tak Williams tan erawh a zawna vawi hnih a tlawmna niin tun hmain vawi hnih a lo tlawm tawh bawk - vawi 28 fight a hmachhawnah vawi 23 a chak a, vawi khat draw a nei tel.

Eubank hian inhnek avanga a hlawh piah lamah PPV share te nen dollar maktaduai hnih bawr vel a hlawha ngaih a ni a, a hneh tak Williams hi dollar maktaduai khat velin a hausak belh thung.