India-in Bahrain leh Belarus inkhelhpui dawn

All India Football Federation (AIFF) chuan March thlaa India-in friendly match a khelhpui turte a puang a, Blue Tigers hian Asian team ṭha Bahrain leh European team Belarus an hmachhawn dawn.

India inkhelhna tur hmun hi Bahrain-ah ve ve a ni dawn a, March 23, zan dar 9:30-ah Bahrain nen inkhelin, March 26 zan dar 9:30-ah Belarus nen an inkhel ve leh thung dawn a ni.

Blue Tigers coach Igor Stimac chuan, "Kan tunlai boruak nen, kan duh ang ram hmachhawn tura inbiakna neihfel a har em em a, team pahnih nen inremna kan nei thei hi ka lawm hle a ni," a ti.

Bahrain hi FIFA ranking-ah 91-na an ni mek a, Belarus hi 94-na niin an player zingah Russian club ṭha Rubin Kazan striker Vitaly Lisakovich leh Rostov midfielder Aleksandr Selyava te ho an awm a, hmachhawn an awlsam lo ang - India hi ranking-ah 104-na an ni mek.

Stimac chuan, "AFC Asian Cup China 2023 final qualifying round atana inbuatsaih nana ti kan ni a, kan inkhel tur pahnih hian min pui viau turah ka ngai. Kan hmachhawn tur team pahnih hi keini aia ranking-ah pawh sang zawk ve ve an ni a, ISL-ah kan nauten ṭha takin an khel bawk a, engkim a kaltluang a nih chuan qualifier atan kan inpeih hman ka beisei," a ti.

AFC Asian Cup 2023 khel tur zawnna hi June 8 aṭangin khelh ṭan a ni dawn a, AIFF chuan India group league match chu thlen an duh thu Asian Football Confederation hnenah an thlen thu an sawi.

February 5, Inrinni khan AIFF Annual General Body Meeting chu neih a ni a, he hunah hian AIFF president Praful Patel chuan, "AFC Asian Cup China 2023 final qualifying round-a India match khelh turte chu thlen kan duh thu AFC hnenah kan thlen tawh a, an chhanna kan la nghak mek a ni," tiin inelna thlen an dil thu hi a sawi a ni.

Praful Patel chuan, "Kan hun tawn mek avangin nikum khan State FA-te hnenah sum kan lo pe tawh a, kuminah pawh State Association te kan hre reng a ni tih lantir nan budget lamah ruahmanna kan siam leh dawn a ni," a ti a, State FA tan hriat a hahdamthlak ang.