Martial telna Sevilla chak zo lo

Inrinni zan La Liga inkhelah Sevilla leh Osasuna te 0-0 in an inhnehtawk. El Sadar-ah mikhual Sevilla tan Manchester United aṭanga loan hmanga an hawh Anthony Martial-a'n inkhel bul a ṭan a, French forward hian goal a keng tel lo.

Osasuna-in bul an ṭan ṭha zawk a, Spanish midfielder Jon Moncayola ball pet chu Sevilla keeper Yassine Bounou-a'n a dang ṭha hle. Second half-ah Julian Lopetegui hote an insiam ṭha a, Youssef En-Nesyri-a'n chance ṭha bik a hlah.

Injury time-ah subsitute Jules Kounde-a'n penalty a hlawh chhuak a, Sevilla-in chak theihna remchang nei mah se tawnhriat nei ṭha Ivan Rakitic penalty pet chu Osasuna keeper Sergio Herrera-a'n a dansak.

Sevilla-in point khat chauh ah an hlawhchhuah avangin hmahruaitu Real Madrid nen an inkarah point thum a la awm a, Los Blancos hi match khatin an khel tlem bawk.