Bayern Munich an kal fal

Bundesliga champion lai Bayern Munich chuan an nomawi an humhim leh ngei dawn niin a lang. Julian Nagelsmann-a naute hian team ṭha zinga mi RB Leipzig 3-2 in an hneh a, match 21 aṭanga point 52 hmuin hma an hruaina chu point kua zet a ni ta.

Bayern hian Thomas Muller leh Robert Lewandowski te hmangin ṭum hnih hma an hruai, mahse mikhual lamin Andre Silva leh Christopher Nkunku te hmangin an sut ve ve thung; defender Josko Gvardiol-a'n anmahni lama a tih luh vangin Bayern hi a vannei zawkah an ṭang.

German champion Bayern captain leh goalkeeper ni bawk Manuel Neuer-a'n mellung pawimawh a phun. Neuer hian Bundesliga match 310 zetah hnehna a chang ta chiah a, legend Oliver Kahn-a record a nihrual, a khum ngei dawn.

Bayern hi point kua zetin an kal fal, chutih rualin pahnihna Borussia Dortmund chuan nizan khan Bayer Leverkusen an mikhual a, an result a zirin an inthlauhna hi a la zim leh hret thei dawn a ni.

Kum 34 mi Julian Nagelsmann chuan a team hlui a hmachhawn chungchang sawiin, "Entu awm loa kan inkhelh deuh reng hnuah fans an awm thei leh ta, a boruak a nuamin a danglam leh ta hle. Team pahnih khan chak theihna remchang kan nei, a vannei zawkah kan ṭang.

"Kan goal chhuah hnuhnung zawk kha chu ven theih tak a ni. Chutih rualin duhthusam ang veka ṭha a khelh hi chu a harsa ve bawk," tiin a sawi a, a player hliam leh hripui kaite an dam chhoh tak avanga a lawm thu a sawi bawk.