August-ah Czech MotoGP tlan dawn

Bike intlansiakna zinga mi Czech Grand Prix chu August thla hian neih theih a ni dawn tih a chiang a, a hmuna entu erawh an awm thei dawn lo - coronavirus vangin MotoGP hi season tir lam chu fans an awm dawn lo, a hnu lamah erawh an awm theih beisei a la ni.

Season hmasa khan Czech GP en tur hian Automotodrom Brno-ah fans 186,000 an pungkhawm. Hripui leng vanga fans awm thei lo tur hi rider tan a khawhar thlak bakah sumdawnna lam thlir chuan channa nasa tak a ni tel bawk.

MotoGP hi hri leng vangin season an la ṭan thei lo, season thara intlansiak hmasa ber turin July 19 hian Jerez-ah an tlan ṭan ang, a hmun ngaiah hian July 26-ah an tlan chhunzawm leh dawn bawk a ni.

Europe ram dangte ang bawkin Czech Republic hi hri leng vangin an buai a, nimin tlai thleng khan hri kai mi 12,178 an nei a, chung zinga 7,822 chu an dam leh tawh thung - hrileng hi la reh chiah lo mah se thunun theih chinah a awm tawh.