Kuminah Mizoram Premier League khel dawn lo

Mizoram football-a inelna sang ber Mizoram Premier League chu Covid-19 vangin kuminah neih theih a ni dawn lo a, Mizoram Football Association hnuaia inelna langsar MFA Super Cup leh Independence Day Football Tournament pawh neih theih a ni lo ang.

Nimin khan MFA hnuaia rorelna sang Executive Committee chu an ṭhukhawm a, MPL, MFA Super Cup leh I Day football chungchanga thutlukna an siam bakah District Football Association leh Zone Football Association zawng zawngte pawh Covid-19 hri lêng avangin thu leh awm hma chu football inelna kalpui rih lo turin an hriattir a ni. 

MPL chu 

Mizoram football hmel thlak danglamtu Mizoram Premier League hi kum 2012 aṭang khan MFA leh Zonet ṭangkawpin an buatsaih ṭan a, kumtin chawl loa neih ziah niin footballer ṭha tam tak a lo chher chhuak tawh. 

Mahse, kumin (July - December)-ah erawh Covid-19 hri leng vangin MPL hi neih theih a ni dawn lo a, tun season (2020-21) chhungin neih a ni dawn lo tihna erawh a la ni lo.  MFA Executive Committee lamin thil kal dan a thlir ang a, kum thar chawhma lamah kalpui theih a nih dawn leh dawn loh chu a rel ṭha leh ang. MPL-ah hian Aizawl FC chu champion lai an ni a, I League club hian season hmasa final-ah Electric Veng FC chu 2-0 in an hneh. 

MFA-in season bul ṭan nan MFA Super Cup leh Independence Day Football Tournament a nei ṭhin a, kuminah erawh Covid-19 hri lengin zia lam a pan theih loh avangin inelna ngaihhlut hlawh tak pahnih hi neih theih a ni dawn lo.  

MPL club-ten inelna pahnih hi Mizoram Premier League urlawk nan leh inbuatsaih nan an hmang ṭhin a, kuminah erawh Mizoram football chawi nungtu inelna pahnih hi kan en thei dawn ta lo a ni. 

MFA-in a hnuaia inelna langsarte neih rih loh turin a rel a, hetiang boruak karah hian a hnuaia District Football Association leh Zone Football Association zawng zawngte pawh MFA aṭanga thu thar a awm hma chu football inelna kalpui lo turin a hriattir. 

Mizoram FA chuan July 24-ah Special General Body chu Aizawla neih turin a ti a, he hunah hian District FA hruaitute nen season hman meka transfer leh registration kalpui dan tur, District FA tinin an huam chhunga inelna an kalpui dan tur leh Inter District Football Competition neih theih tur chinte an rel ang. 

Covid-19 avangin 2019-20 season chhung khan MFA hnuaia inelna ruahman sa zingah MFA Cup, Inter District Junior Boys, Inter District Women's Championship leh MFA Women's League, MFA Futsal League-te khelh hman a ni lo. 

DFA thar 

Mizoram sorkarin Hnahthial, Khawzawl leh Saitual te chu district thara a puan tak avangin district thar pathum huam chhungah hian MFA chuan District Football Association thar a din dawn a, MFA hnuaiah District FA thar pathum a awm dawn tihna a ni. 

Ruahman dan chuan July 18 hian district pathum-ah hian District FA hruaitu lailawk (adhoc body) din a ni dawn a, MFA hruaitute leh an awm mekna District FA hruaituten he hun hi an hmanpui ang. 

India rama football thuneitu sang ber All India Football Federation chuan State FA thlan bikte nen ṭangrualin state huam chhunga AIFF Youth League kalpui a tum a, state thlan bik zingah Mizoram a tel. 

MFA chuan AIFF duhsakna hi lawm taka pawmin hlawhtling taka kalpui an tum a, inelna ṭhenkhat hi chu District FA kuta dah a ni ang. AIFF lam hian state thlan bik te hi vawi hnih (video conferencing) meeting a neihpui tawh.

MFA chuan technical rules an hman mek chu ennawn a, siam ṭhat ngaite siam ṭha turin MFA technical committee kutah an dah. 

Nimin tlai khan CYMA Hall, Tuikhuahtlangah CYMA hnuaia Sports Sub Committee-in kum 2020 chhunga hmalak chhunzawm dan tur a rel  a, Covid-19 vangin inelna ruahman tawh sa Cricket, Volleyball leh Athletics-te chu 

ṭhulh turin thutlukna an siam.

Nimin meeting-ah hian Cricket Association of Mizoram, Mizoram Volleyball Association leh Mizoram Athletics Association aiawhte an tel a. Thutlukna hi CEC-ah thlen a ni ang a, a pawmpui a nih chuan Cricket leh Athletics atana entry fee pe tawh Branch-te pawhin an la kir thei ang.