Arsenal Vs Leicester - Auba, Laca & Vardy

Premier League match nga khelh tur la awmah Arsenal-in Champions League beiseina an la nei; Mikael Arteta hote hian Europe inelna sang ber khelh an tum a nih chuan zanin dar 12:45-ah Leicester City an hneh ngei a ṭul dawn. 

Pathumnaa awm Foxes tan pawh tha thlah a la thiang lo, vawi khat chetsual leka palina pawna awm thei an nih avangin Emirates Stadium-a inkhel tur hi a pawimawh takzet.

Inkhel hmuhnawmna belhchhah turin Gunners-in an match hnuhnung berah Wolverhampton Wanderers 2-0 in an hneh a, Alexandre Lacazette-a'n goal a khung. French forward kawppui turin Pierre-Emerick Aubameyang a awm a, tlarhma  ngawr ngawrah chuan 'anni' bak an awm chuang lo. 

Leicester City-in an match hnuhnung berah Crystal Palace 3-0 in an sawp a, Jamie Vardy-a'n goal a khung leh tak avangin David Luiz-a awmna Arsenal tlarhnung tan awm ti nuam lo tham a tling ang. 

Mikael Arteta-a'n Arsenal a enkawl hnuah Pierre-Emerick Aubameyang leh Alexandre Lacazette te an inkawp ta meuh lo. Spanish manager chuan, "Ka lawmpui takzet. Khualmuala goal a khung lohna a rei tawh a, Wolves nen khan goal a khung chauh ni loin a rawn luh khan inkhel a sawi danglam hle. 

"Arsenal ka enkawl hma pawhin a theihna leh a thawhrimna te avangin ka player duh zawng tak chu a ni," tiin Laca chungchang a sawi a, Leicester City nen an inkhelh hunah Auba nen inkawp thei dinhmunah a ding.

Arsenal-in Wolves an hmachhawn ṭum hian French forward hi minute 10 pawh a inlan tling lo a, chuti chung chuan 'world class' player a nihzia a pholang. Kum 29 mi Laca hian tun season Premier League-ah goal riat a khung tawh a, a theihna enin a tlem mah mah. 

Hei chauh hi ni loin Arteta-a'n tawnhriat nei ṭha forward aiah kum 21 mi Eddie Nketiah a thlang fo a, Laca hian bul a ṭan a nih chuan khelhna hmun chang turin a dinhmun a sawhngheh a ṭul ang. London club hian Foxes lakah Wolves nena inlan lo Nicolas Pepe an chhawr thei tawh dawn. Gunners player manto ber Pepe hi a nupuiin fa a hrinsak avangin match hnuhnung berah hian a inlan lo. Arsenal tlarhmaa Auba, Pepe, Laca te an inkawp thei a nih chuan eng team tan pawh dan huphurhawm a ni a, chutihrualin rawlthar duhawm Bukayo Saka a awm ve tlat avangin bul an ṭan vek kher lo ang.

Kum 18 mi Saka hian Wolves lakah goal hmahruai mawi zetin a khung a, theihna sang tak a nei tih loh phal chi a ni lo. Saka goal khung dan thlirtu chuan vei lam aṭanga Kieran Tierney ball pet an hmu tel ang. Scottish defender hi vei lam aṭanga Arsenal nawrna pakhat a ni a, tlarhnungah defence pathum awmin mual sirah Tierney leh Cedric Soares/Hector Bellerin te chhuah zalen an ni.

Premier League-a Leicester City an champion zawh khan Arsenal-in Jamie Vardy an la teuh hle. Manager inren Arsene Wenger-a'n sum phal tam hlek se tun hnaia English striker ṭha ber zinga mi hian Gunners kawr a ha thei ang. 

Amaherawhchu London club-in Vardy an sawm chhuah theih loh avangin zaninah chuan English striker hi Gunners rum ṭhaihtu ber a ni leh dawn. Kum 33 mi Vardy hi a tlan chak a, a huaisen bawk avangin goal a sual chhuak leh ṭhin. A kawppui Kelechi Iheanacho hi tun hnaiah a ke a hmui a, match hnuhnung pahnihah goal a khung.

Leicester City-in Crystal Palace laka inlan lo James Maddison a dam hman a beisei dawn a, English midfielder hi a inlan thei a nih chuan midfield battle a hmuhnawm sawt ang. Brendan Rodgers hian awmze nei takin a naute a khelhtir ṭhin a; Swansea, Liverpool leh Celtic a enkawl lai aṭang tawhin football hmuhnawm a pho chhuak tawh ṭhin. Arsenal aiin point kuain an sang a, chu chuan an dinhmun a sawifiah.

Arsenal manager Mikael Arteta chuan, "Champions League khel tur chuan kan khelh hmabak chak vek a ngai a, a bak chu ṭawngṭaia nghah tawp a ni tawh mai. Match khat chak a tawk lo a, match tinah chak zel a pawimawh. A êng zawnga thlir chuan kan tan Europe kha a hla hman em em a, tunah erawh kan hnaih leh ta deuh. Kan khelh hmabakah chak zel phawt a ṭul a ni," tiin Europe khel tura beiseina an neih thu a sawi.

An khingpui tur chungchang sawiin Arteta chuan, "Brendan leh a staff-te hian an khelh dan hmang an thlak a, club lian lakah an hlawhtling. Inkhel thunun an duh a, khelh dan nghelnghet an nei a, team ṭha tak an ni. Vardy pawh kum 33 mi a ni tawh a, chuti chung chuan match tinah thahrui a ngah ṭhin hle. A fakawm takzet," tiin a sawi.