Messi-a'n Barca-ah a hun tawp a hmang ang - Bartomeu

Barcelona president Josep Maria Bartomeu chuan Lionel Messi-a'n Barcelona-ah foootball career a tih tawp tur thu a sawi.

Kum 33 mi Messi hi kum 2021 hian Catalan club-a a contract neihlai a tawp dawn a, Argentina international hian a contract a pawtsei duh lo tih thawm a awm. Kum 57 mi Bartomeu chuan, "Contract chungchanga kan inbiakna zawng zawng hi sawi a rem lo. Amaherawhchu Messi hian vawi tam Barcelona-a a hun tawp hman a duh thu a sawi. Hun rei tak football a la khelh theih a beiseiawm a, chuvangin kan club chuan a theihna hi kan la hlawkpui rih ang," tiin Messi chungchang a sawi.

Barcelona hian nakkum hian club inthlan an nei dawn a, President inchuh boruak a sang chho hle. Khawthlang media-te pawhin Messi hian Catalan club chhuahsan hi a duh tak tak lo niin an hria a, chutihrualin president Bartomeu erawh a ring tawk lo tih thawm a awm. Lionel Messi awm hnuah Catalan club-in nasa takin hma an sawn a, La Liga-ah ringawt pawh vawi 10 an champion a, Copa del Rey-ah vawi ruk an champion bakah Champions League nomawi vawi li an chawi; hemi a nih avang hian Argentine forward thlirna hian Barcelona inthlanah nghawng a nei ang.