Youth Olympic Games ; Jeremy leh Siami ten Argentina an pan
2018 Summer Youth Olympic Games chu October 6-18 chhung hian Argentina khawpui Buenos Aires-ah neih a ni dawn. Khawvel tleirawl infiammite intawhkhawmna hmun puiah hian Mizo rawlthar Jeremy Lalrinnunga leh tleirawl Lalremsiami Hmar te chu India aiawhin an inlan dawn, India team hian tukin khan inelna tur hmun an pan.
India hian infiammi 46 a tir chhuak a, infiammna peng hrang 13 - Archery, Athletics, Badminton, Boxing, Field Hockey, Judo, Rowing, Shooting, Sport Climbing, Swimming, Table Tennis, Weightlifting leh Wrestling huangah an tel dawn a ni.
Youth Olympic-ah hian ram 206 aṭangin infiammi 3,998 zet an tel tura ngaih a ni a, infiamna peng hrang 241 hmangin inelna hi neih tur a ni ang. Ram pahnih Kosovo leh South Sudan te tan Youth Olympic an tel vawi khatna tur a ni ang, infiamna khawmpui lian hi Asia khawmualpui pawna an nghah vawi khatna tur chiah a ni.
Jeremy beiseina
"Olympic khelh ngei ka tum a, ka tum a hlawhtlin theih nan ka taksa leh rilru zawng zawng ka hlan dawn. Mizoram chu ngai viau ṭhin mah ila training kan neih ngawrh em avangin ka rawn haw tawh mai mai lo ang," tiin 2017 September thla khan Jeremy Lalrinnunga hian Vanglaini a lo hrilh tawh a, hemi hnuah hian Mizorama rawn haw loin inbuatsaihna a nei tlang chhunzawm.
Weightlifting huanga India aiawh tur hian April thla khan, Asian Youth Olympic Qualification Championship-ah Jeremy hian silver a la a, August thla khan trial nei lehin harsatna nei loin a paltlang. Indian Weightlifting Federation-in infiammi a tirh zingah ani chiah hi mipa kal awmchhun a ni.
Govt. Complex naupang Jeremy chuan, "Medal la phak ngei turin ka inbuatsaih a, inbuatsaihna ka neih ṭhat avangin Olympic hi ka huphurh hran lo," tiin Vanglaini a hrilh. A sulhnu leh medal lak tawh dan en chuan podium a lawn phak a nih pawhin a mak lo ang - chutihrualin Olympic erawh a boruak a danglam tih hriat tel a ṭha awm e.
Mizo nula
Youth Olympic-a inelna tur pakhat Field hockey hi 5-a-side tournament a ni dawn a, Mizo nula Lalremsiami Hmar chu India vice captain a ni ang. Hmeichhe team 12 inlan tur zingah Asian aṭangin India leh China chiah an tel phak a, khawvela a thiam thlan khawm inkhel tur an nih avangin a awlsam lo ang.
Mizo infiammi zingah Asian Games medal la thei hmasa ber Siami chuan, "Kan theihtawpin inbuatsaihna kan nei a, a hlawhtlinna chu Pathian kutah a awm. Tun hnaiah tournament khel hnem deuh mah ila India leh Mizoram tan chuan theihtawp ka chhuah zel ang," tiin Vanglaini a hrilh.
India forward Siami hi Commonwealth Games leh Asian Games-ah te khan, squad player zinga a naupang ber ni chungin a feh chhuak. Tun ṭumah erawh a kum rualpui te nena inkhel tur an nih avangin a chungah mawhphurhna a sang zual dawn a - tlarhma lamah India beiseina a ni dawn.
Jeremy Lalrinnunga Sulhnu
International Level
1 IWF World Youth Weightlifting Championships 2016
56kg Silver
2 Commonwealth Youth Weightlifting Championships 2016
56kg Gold
3 Asian Youth Weightlifting Championships 2016
56kg Silver
4 IWF World Youth Weightlifting Championships 2017
56kg Silver
5 Commonwealth Youth Weightlifting Championships 2017
56kg Gold
6 Commonwealth Junior Weightlifting Championships 2017
56kg Gold
7 Asian Youth Weightlifting Championships 2018
56kg Silver
8 Asian Junior Weightlifting Championships 2018
56kg Bronze
National Level
1 11th National Sub Junior Boys & Girls 2016 50kg Gold
2 12th National Sub Junior Boys & Girls 2016 56kg Gold
3 53rd Men and 29th Women Junior National 2016
56kg Gold
4 13th National Sub Junior Boys & Girls 2018 56kg Gold
5 54th Men & 30th Women Junior National 2018 56kg Gold
Lalremsiami Hmar Zinkawng
2000 : Lalremsiami Hmar pian kum.
2011 : Kum 11 mi chauh niin Thenzawl Hockey Academy a zawm.
2016 : National Hockey Academy a awm turin thlan a ni a, November thlaah a lut.
2017 : India Junior Camp tana training a nei lai chu India coach Harendra Singh-a'n hmu fuhin, senior team tana khel turin a ko.
2017 : November thlaah India tan Asian Cup a khel a, match zawng zawngah inlan vekin goal hnih a khung; India a champion pui.
2018 : April 4 - 15 chhunga neih 2018 Commonwealth Games-ah India tan koh a ni a, kum 17 mi chauh a la nih avangin squad player naupang ber a ni; Malaysia 4-1 a an sawp ṭumin goal khat a khung.
2018 : Women’s Hockey World Cup 2018-ah India aiawhin a inlan a, kum naupang ber a ni zel. India hi semifinal a thlenpui a, Italy an hneh ṭumin goal a khung.
2018 : Asian Games-ah India ai a awh leh, Asian ramte inelna lianah hian goal li khungin, India chu silver medal a vuak chhuahpui a ni. Mizo infiammi zinga Asian Games medal la thei hmasa ber a ni nghal.
2018 : 2018 Summer Youth Olympic Games-ah India aiawhin a feh chhuak.